टोमराज मेहता
सुनसरी। सुनसरीको हरिनगर गाउँपालिकामा भूमिहीन दलित र सुकुम्बासी हरुलाई लालपूर्जा वितरण गर्नको लागि निस्सा प्रदान गर्न सुरु गरिएको छ ।
राष्ट्रिय भूमि आयोग जिल्ला समिति सुनसरीले हरिनगर गाउँपालिका वडा नम्बर–६ घुस्कीका भूमिहीन दलित र सुकुम्बासी हरुलाई आजबाट निस्सा वितरण गर्न सुरु गरेको हो ।
हरिनगर गाउँपालिका वडा नम्बर ६ घुस्कीका ८६ जनालाई निस्सा प्रदान गरिएको भूमि आयोग जिल्ला समिति सुनसरीका अध्यक्ष भगरत खत्वेले जानकारी दिनुभयो । लामो समयसम्म जग्गा नपाएका सुकुम्वासी नागरिकले निस्सा प्राप्त गरेसँगै अब लालपुर्जा पाउने बाटो खुलेको उहाँले बताउनुहुँदै लालपुर्जा प्राप्तीका लागि गाउँपालिकाले आवश्यक कार्य गर्न सहजीकरण गर्नुपर्नेमा जोड दिनुभयो ।
हरिनगर गाउँपालिकाका अध्यक्ष हाजी गफार अन्सारी मियाँले भूमिहीन दलित, सुकुम्वासी र अव्यवस्थित बसोबासीलाई लालपूर्जा वितरण गर्नका लागि निस्सा दिने कार्य सुरु गरिएको बताउनुभयो । निस्सा प्राप्त गरे पछि भूमिहीन दलित, भूमिहीन सुकुम्बासी र अव्यवस्थित बसोबासीहरु अब चाँडै नै लालपुर्जा पाउने विश्वास व्यक्त गर्नुभयो ।
अध्यक्ष अन्सारीले जग्गा नाप्ने बेलामा यही निस्सा काम लाग्ने भएकाले सुरक्षित साथ राख्न अनुरोध गर्नुहुँदै उहाँले लालपूर्जा पाउने एउटा चरण पूरा भएको बताउनुभयो । भूमिहीन दलित, भूमिहीन सुकुम्बासी र अव्यवस्थित बसोबासीहरुको अनुगमन गरेर जग्गा वितरणका लागि प्रक्रिया अघि बढाउने उहाँले जानकारी दिनुभयो ।
