हरिनगरा। सुनसरीको हरिनगर गाउँपालिका-४ स्थित कृषि कार्यालय हाताभित्र पशु सेवा शाखा कार्यालयको प्रयोगशाला भवन उद्घाटन भएको छ ।
सुनसरी क्षेत्र नम्बर ४ प्रदेश ख बाट निर्वाचित काेशी प्रदेशसभा सदस्य तथा काेशी प्रदेशका सभामुख हाजी इस्राइल मन्सुरी र हरिनगर गाउँपालिकाका अध्यक्ष हाजी गफार अन्सारीले संयुक्त रुपमा पशु सेवा शाखा कार्यालयको २ कोठे पक्की र माथि कर्कटपातासहित नवनिर्मित भवनको उद्घाटन गर्नुभएको हो ।
उद्घाटनको क्रममा बोल्दै काेशी प्रदेशसभा सदस्य तथा काेशी प्रदेशका सभामुख हाजी मन्सुरीले कृषि कार्यालयको भवनबाट पशुपालक किसानहरुलाई सहज तरिकाबाट सेवा प्रवाह गर्नुपर्नेमा जोड दिनुभयो ।
सभामुख मन्सुरीले सेवा लिन आउने सेवाग्राहीलाई समयमै सेवा प्रदान गर्न कुनै कसर बाँकी नराख्न कर्मचारीहरुलाई अनुरोध समेत गर्नुभयो ।
मुलुकमा लम्पी स्किन रोगबाट पशुहरुको मृत्यु हुनेको संख्या दिनप्रतिदिन बढ्दै गएको र रोगबाट ग्रसित भएका पशुहरुलाई उपचार गर्नुपर्ने उल्लेख गर्नुभयो ।
कोशी प्रदेश सरकारले पीडित किसानहरुको लागि राहत उपलब्ध गराउनका लागि पहल गर्दै आइरहेकोले क्षतिपूर्तिको अभिलेखिकरण गरि उपलब्ध गराउने सभामुख मन्सुरीले विश्वास व्यक्त गर्नुभयो ।
उद्घाटन कार्यक्रमको अध्यक्षता गर्नुभएका हरिनगर गाउँपालिकाका अध्यक्ष हाजी गफार अन्सारीले पालिकाभरीका पशु किसानलाई सेवा दिदै आएको बताउनुभयो । अध्यक्ष हाजी अन्सारीले सबै क्षेत्रमा प्राथमिकता राखेर काम गर्दै आएकोले पशुपालक किसानको हकमा पनि पालिकाले निगरानी बढाएको उहाँले बताउनुभयो ।
कृषि तथा पशु शाखाको कार्यालय जीर्ण भई सकेकाले मानवीय हिसाबले बस्न जोखिमपूर्ण रहेकाले तत्काल काम चलाउकै लागि भए पनि माथिबाट कर्कटपाता हालेर दुई कोठाको भवन निर्माण गरिएको र कृषि कार्यालयका लागि कोशी प्रदेश सरकारसँग पहल गरेर कृषि भवन पनि बनाउने योजना रहेको पालिका अध्यक्ष हाजी अन्सारी सुनसरी अनलाइनको कुराकानीमा बताउनुभयो ।
हरिनगर गाउँपालिकाले चालू आर्थिक वर्ष २०८०/ ०८१ मा पालिकाबाट भ्याटसहित ९ लाख ५० हजार बजेटमा भवन निर्माण भएको पालिकाका प्रमुख प्रशासकीय अधिकृत तुलाराज थापा मगरले जानकारी दिनुभयो ।
