देवानगञ्ज । सुनसरीको देवानगञ्ज गाउँपालिकाका पूर्व अध्यक्ष लालीप्रसाद मेहताको आज उपचारको क्रममा मृत्यु भएको छ ।
नेपाली काङ्ग्रेस सुनसरीका पूर्व जिल्ला सदस्य तथा नेपाली काङ्ग्रेसका केन्द्रिय महाधिवेशन प्रतिनिधि समेत रहनुभएका ७८ वर्षीय मेहताको उपचारको क्रममा विराटनगरस्थित विराट टिचिङ अस्पतालमा मृत्यु भएको हो ।
पालिकाले भोलि बुधबार मेहताको निधनमा शोक विदा दिएको छ । देवानगंज गाउँपालिकाका अध्यक्ष बेचन मेहताले एक प्रेस विज्ञप्ति जारी गर्दै दक्षिणवर्ती क्षेत्रको ठुलो हस्ती गुमाएकोप्रती दु:ख व्यत्त गर्दै मृतक आत्माको चिर शान्तिको कामना सहित शोकाकुल परिवारमा गहिरो समवेदना व्यत्त गर्नुभएको छ ।
मेहताको निधनपछि नेपाली काङ्ग्रेसलाई ठुलो क्षती पुगेको नेपाली काङ्ग्रेसका केन्द्रिय सदस्य राजिव कोइरालाले बताउनुभयो ।
नेपाली काङ्ग्रेसका नेता तथा पूर्व राज्यमन्त्री सिताराम मेहताले सुनसरीको दक्षिणीवर्ती क्षेत्रको बलियो खम्बा गुमाएको बताउनुभयो ।
नेपाली काङ्ग्रेस सुनसरीका युवा नेता तथा जिल्ला समन्वय समिती सुनसरीका प्रमुख समेत रहनुभएका जिल्ला समन्वय समिति महासंघका केन्द्रिय अध्यक्ष राजन मेहताले पालिका अध्यक्ष भएको बेला विकास गरेर जनताको लोकप्रिय नेता बन्नुभएको बताउनुभयो ।
नेपाली काङ्ग्रेस सुनसरीका सभापति केदार भण्डारीले जनजनको मनमा बस्न सफल भएका नेतालाई गुमाउँदा काङ्ग्रेसलाई ठुलो क्षती पुगेको बताउनुभयो ।
मेहताको भोलि बुधवार अन्त्येष्टि गरिने परिवारिक श्रोतले जनाएको छ ।
