नसीम अन्सारी
भुटाहा,। सुनसरीको हरिनगर गाउँपालिकामा आजदेखि ट्राफिक जनचेतनामूलक कार्यक्रम सप्ताह-२०८० शुभारम्भ गरिएको छ ।
सवारी दुर्घटना न्युनिकरण गर्ने मुख्य उद्देश्य रहेको अभियान सात दिनसम्म सञ्चानल हुनेछ ।
सुनसरीको हरिनगरमा सम्पूर्ण सुरक्षा निकाय, विद्यार्थी, विभिन्न संघ संस्थाका प्रतिनिधिहरुको सहभागितामा आयोजित र्याली पश्चात ट्राफिक सप्ताहको शुभारम्भ गरिएको हो ।
हरिनगरमा आयोजित समारोहकाबीच सुनसरीका निमित्त प्रमुख जिल्ला अधिकारी अाेम प्रसाद भट्टराईले ट्राफिक सप्ताहको उद्घाटन गर्नुभएको छ ।
मंसिर २६ गते प्रभातफेरी र अभियानको उद्घाटन, २७ गते तीब्र गति नियन्त्रण तथा पार्किङ निषेध, २८ गते मोटरसाइकल चालकलाई प्रशिक्षण र लेन अनुशासनको पालना, २९ गते सिटी तथा इरिक्सा र स्कुल बसलाई प्रशिक्षण, ३० गते मापस तथा लापसे चेकिङ, १ गते चालकको स्वास्थ्य र सवारीको यान्त्रिक जाँच र २ गते अन्तरक्रिया र समीक्षा गर्दै अभियानको समापन गरिने काेशी प्रदेश ट्राफिक प्रहरी कार्यालयले जानकारी दिनुभयो ।
सातै दिन सात काम, सडक सुरक्षा हाम्रो अभियान नारासहित शुभारम्भ गरिएको छ ।
उक्त कार्यक्रममा सुनसरीका निमित्त प्रमुख जिल्ला अधिकारी अाेम प्रसाद भट्टराईले सवारी दुर्घटना न्यूनिकरण सबैको साझा दायित्व भएको बताउनुभयो ।
यातायात व्यवसायी र ट्राफिक प्रहरीको मात्रै दायित्व सम्झिएका कारण दुर्घटना न्यूनिकरण हुन नसकेको उहाँको भनाइ थियो ।
कार्यक्रमका विशेष अतिथि सुनसरीका एसपी विपिन रेग्मीले सवारी दुर्घटना न्यूनिकरण नै अभियानको मुख्य उद्देश्य भएको बताउनुभयो ।
उहाँले दुर्घटना कसैको निमित्त प्रिय नहुने भन्दै सबैको प्रयासबाट न्यूनिकरण गर्नुपर्ने बताउनु भएको छ ।
सवारी चलाउने व्यक्ति, सडकको सरोकारवाला निकाय र पैदल यात्रीले मात्रै ख्याल गर्दा दुर्घटना न्यूनिकरण भएर जाने उहाँको भनाइ थियो ।
उक्त कार्यक्रममा हरिनगर गाउँपालिकाका अध्यक्ष हाजी गफार अन्सारीले आम नागरिकले ट्राफिक नियम सम्बन्धी ज्ञानको पालना गर्नुपर्ने बताउनु भएको छ ।
ट्राफिक नियम पालना गरे मात्रै दुर्घटना न्यूनिकरण हुने भन्दै उहाँले ट्राफिक सचेतना फैलाउन आग्रह गनुभयो ।
जिल्ला प्रहरी कार्यालय सुनसरीका प्रहरी नायव उपरीक्षक नवीनकृष्ण भण्डारीले सुनसरीमा मापसेपछि लापसे गर्ने दर बढेर गएको जानकारी दिनुभयो ।
उहाँले मापसे परीक्षण छल्न लापसे गरिरहेको अनुसन्धानबाट भेटिएको बताउनुभयो । भण्डारीले सबैले आफ्नो सुरक्षा गरेर सवारी चलाए मात्रै पनि दुर्घटना दर घटेर जाने बताउनुभयो ।
