टोमराज मेहता
इनरुवा । नेपाली कांग्रेस सुनसरीभित्र असन्तुष्टि बढ्दै गएको पाइएको छ । नेपाली कांग्रेसको १४ औं महाधिवेशनदेखि असन्तुष्टि बढ्दै गएको पाइएको हो । २०७९ को स्थानिय तहको निर्वाचन र प्रतिनिधिसभा तथा प्रदेशसभाको निर्वाचनदेखि हालसम्म नेपाली कांग्रेस सुनसरीमा असन्तुष्टि बढ्दै गएको हो ।
नेपाली कांग्रेस सुनसरीका सभापति केदार भण्डारी नेतृत्वको जिल्ला कार्यसमितिले जनता केन्द्रित कार्यक्रम गर्न सकेको छैन् । कांग्रेसको १४ औं महाधिवेशन, स्थानिय निर्वाचन र प्रतिनिधिसभा तथा प्रदेशसभा निर्वाचनमा देखिएको गुट–उपगुटका कारण असन्तुष्टि बढेपनि जिल्लाका नेतृत्व तहबाट कुनै पहल र प्रयास भएको देखिदैन् ।
पार्टीको समिक्षा समेत जिल्लादेखि वडा तहसम्म नहुनुले स्वाभाविक रुपले नेता तथा कार्यकर्ताहरुमा निराशा बढ्नु हो । पार्टीभित्र अन्तरघात गर्नेहरुको पार्टीले नाम समेत संकलन गरेको छैन् । १२ वटै स्थानियतहरुमध्ये केहीले कार्वाहीको नाम सिफारिस गरेपनि कार्वाही नगरेपछि पार्टीभित्र असन्तुष्टि दिनप्रतिदिन बढ्दै गएको पाईन्छ ।
जिल्ला नेतृत्वहरुको कार्यशैली सन्तोषजनक नभएपछि नेता तथा कार्यकर्ताहरु आक्रोसित बन्दै गएको छ । पार्टीका सभापति भण्डारी लगायतका जिल्ला नेतृत्वहरुले आएको गुनासोलाई समेत सम्वोधन गर्न सक्नु नै पार्टीको महत्वपूर्ण कमजोरी हो ।
पार्टीभित्र उठेका सवालहरुलाई कसले सम्वोधन गर्ने ? जनताको समस्या समाधान कसले गर्ने ? असन्तुष्टिलाई कसरी समाधान गर्ने ? गुट–उपगुटलाई कसरी समायोजन गर्ने ? निराशालाई कसरी आशामा परिर्वतन गर्ने ? समीक्षा कहिले गर्ने ? निर्वाचनमा पराजित भएका उम्मेदवारहरुसँग अन्तरसंवाद आवश्यक छ कि छैन् ? सञ्चारकर्मीहरुसँग अन्तरसंवाद कहिले गर्ने ? पार्टीको भातृसंगठन लगायत शुभेच्छुक संस्थाहरुसँग छलफल र बहस आवश्यक छ कि छैन ? लगायतका प्रश्नहरु अहिल चर्चाको विषय बनेको छ ।
इनरुवा नगरपालिकाका प्रमुखको जिम्मेवारी सम्हाल्दै आएका पार्टी सभापति भण्डारी अहिले व्यस्त बनेपछि पार्टी लथालिङ्ग भएको जानकारहरुको बुझाई छ । नगरपालिकाबाट एकसाथ कर्मचारी निकाल्नु नै पार्टीको ठूलो गल्ति भएको र त्यसपछि पार्टीभित्र एक प्रकारको असन्तुष्टिको भिड बढदै गएको छ । त्यसको परिणाम प्रतिनिधिसभा र प्रदेशसभाको निर्वाचनले पनि देखाएको छ ।
नेपाली कांग्रेसका केन्द्रिय सदस्य तथा नेपाली कांग्रेस सुनसरीका पूर्व जिल्ला सभापतिको जिम्मेवारी सम्हालेका राजिव कोइरालाको नेतृत्वमा सचिव पदमा रहेर केदार भण्डारी काम गरेर पोख्त मानिएकोले उनलाई सभापति पदमा १४ औं जिल्ला अधिवेशनबाट धेरै आशा र विश्वासका साथ मत दिएर जिताएका थिए । तर अहिले उल्टो भएको छ । काम भन्दा धेरै गफ दिने नेताको रुपमा चिनिन थालेको छ ।
पार्टीको अवस्था हेर्दा नाजुक बनेको छ । कार्यक्रमहरुमा भाषण दिन त माहिर बनेका छन् तर पार्टीको अवस्थाका बारेमा कसैले पनि विश्लेषण गर्न सकेका छैन् । नेपाली कांग्रेस अहिले सुनसरीमा वास्तवमा कमजोर सावित भएको छ । नेपाली कांग्रेसको लालकिल्ला भनेर चिनिएको सुनसरी जिल्ला अहिले नेकपा एमालेको लालकिल्ला भनेर चिनिन थालेको छ । यसको जिम्मा कसले लिने ? अहिलेको नेतृत्व लिने कि गुटउपगुटको नाममा पार्टीलाई कमजोर बनाई राख्ने ?
सुनसरीको चारवटा निर्वाचन क्षेत्र मध्ये सुनसरीको निर्वाचन क्षेत्र नम्बर–४ मा मात्रै प्रतिनिधिसभा र प्रदेशसभाका उम्मेदवारहरु निर्वाचित भएका छन् भने तीनवटा निर्वाचन क्षेत्र निल गएको छ । तैपनि पार्टीका नेताहरु खोक्लो भाषणमा सिमित छन् ।
नेता तथा कार्यकर्ताहरुमा नयाँ पार्टीको मोह बढ्दै गएको बेलापनि कांग्रेसका नेताहरुमा एकजुट देखा पर्दैन् । देखावटी हिसाबले मञ्चमा एकै ठाउँमा बस्ने अनि भाषण गरेर देखाउने कि हामी एक छौं भनेर । नेता तथा कार्यकर्ताहरुले यो सबै कुरा बुझन थालेका छन् ।
नेपाली कांग्रेस सुनसरीले लालकिल्ला अब गाड्नका लागि धेरै मेहनतको आवश्यकता छ । त्यसैले पार्टीभित्र भएका कमिकमजोरीहरुलाई औल्याउँदै बलियो बनाउनेतर्फ सबैको ध्यान केन्द्रित हुन आवश्यक देखिन्छ ।
