टोमराज मेहता
विराटनगर । हरिनगर गाउँपालिकाका अध्यक्ष हाजी गफार अन्सारीले स्वास्थ्यमन्त्री मोहन बहादुर बस्नेतलाई प्राथमिक स्वास्थ्य केन्द्र हरिनगरमा मेडिकल अधिकृतको व्यवस्था मिलाइदिन आग्रह गरेका छन् ।
विराटनगरमा आयोजित नेपाल जनसांख्यिक तथा स्वास्थ्य सर्वेक्षण २०२२ को प्रादेशिक सार्वजनिकीकरण कार्यक्रमलाई सम्वोधन गर्दै हरिनगरका अध्यक्ष हाजी अन्सारीले प्राथमिक स्वास्थ्य केन्द्र हरिनगरमा निर्माणाधिन भवनको रकम निकासा गर्न सरकारले ढिलाई गरेको हुँदा यथास्रिघ निकासा गरिदिनका लागि पहल गरेका हुन् ।
हरिनगर गाउँपालिकाको स्वास्थ्य अवस्थाका बारेमा स्वास्थ्यमन्त्री बस्नेत र कोशी प्रदेशका मुख्यमन्त्री केदार कार्की तथा प्रदेशका सचिवहरुलाई जानकारी गराउँदै अध्यक्ष हाजी अन्सारीले स्वास्थ्य सम्वन्धि थप सेवा उपलब्ध गराउन माग गरेका छन् ।
संघीय सरकार र प्रदेश सरकारको बिशेष प्राथमिकतामा रहेको स्वास्थ्य क्षेत्रलाई हेर्ने दृष्टिकोण फरक रहेको गुनासो पोख्दै अध्यक्ष अन्सारीले सुनसरीको दक्षिणी भेगको सीमावर्ती क्षेत्र हरिनगर गाउँपालिकामा विकास गरेपनि संघीय सरकारको नीति, बजेट निकासा र ढिलाईका कारण काम गर्न नसकिरहेको बताएका छन् ।
पालिकाहरुको योजना तथा बजेट निकासालाई प्राथमिकतामा राखेर काम गर्न स्वास्थ्यमन्त्री बस्नेतलाई आग्रह गर्दै अध्यक्ष अन्सारीले पालिकाहरुले गरेका गतिविधिहरुमा हातेमालो गर्नुपर्नेमा जोड दिएका छन् ।
स्वास्थ्यमन्त्री बस्नेतले प्राथमिक स्वास्थ्य केन्द्र हरिनगरमा निर्माणाधिन रहेको भवनका लागि बजेट निकासा गर्न आफूले पहल गर्ने प्रतिवद्धता व्यक्त गरेका छन् ।
कोशी प्रदेशका मुख्यमन्त्री कार्कीले प्रदेश सरकारको प्रमुख प्राथमिकता मानवीय विकास भएकाले स्वास्थ्य क्षेत्रसँग सम्वन्धि सबै कामलाई फास्ट ट्रयाकबाट अगाडी बढाउने प्रतिवद्धता व्यक्त गरेका छन् ।
