हरिनगर । सुनसरीको हरिनगर गाउँपालिका–४ स्थित उपयुक्त कृषि सहकारी संस्था लिमिटेड हरिनगरको आठौं बार्षिक साधारण सभा सम्पन्न भएको छ ।
हरिनगर माध्यमिक विधालय हरिनगरामा उपयुक्त कृषि सहकारी संस्था लिमिटेड हरिनगरको आठौं बार्षिक साधारण शनिवार सम्पन्न भएको हो ।
सो साधारण सभाका प्रमुख अतिथि हरिनगर गाउँपालिकाका अध्यक्ष गफार अन्सारीले पालिका अन्र्तगत रहेका सबै सहकारी संस्थाहरुलाई सहयोग गरिरहेको बताएका छन् ।
पालिकाभित्र सहकारीहरुको योगदान महत्वपूर्ण रहेकोले विकास गर्न आफूलाई सहज भएको उनले बताए । हरिनगर गाउँपालिकाले आफनै प्रशासनिक भवनको तयारी गरेर काम सुरु गरेको र केही बाँकी रहेको भवनमा शनिवार भवनको छत ढलाई भएको बताए ।
हरिनगरमा किसानहरुले उत्पादन गरेको तरकारी,सागसब्जी, आलु लगायतकालाई सुरक्षित साथ राख्नका लागि कोल्डस्टोर निर्माण गर्ने प्रक्रियामा रहेकोले अब किसानहरुलाई बाहिर जानुपर्ने बाध्यता हटेर जाने उनले बताए ।
साधारण सभाका संस्थाका अध्यक्ष सहदेव मण्डलले प्रतिवेदन प्रस्तुत गरेका थिए । कार्यक्रममा बचतकर्ता तथा ऋणीहरुलाई कृषि समाग्री वितरण समेत गरिएको संस्थाका उपाध्यक्ष ओम कुमार मेहताले जानकारी दिए ।
कार्यक्रममा विशिष्ट अतिथिहरु देवनारायण मेहता, हिरालाल पाल, राजेश पाल, शिवराम मेहता लगायतको सहभागिता रहेको थियो ।
