इनरुवा । अख्तियार दुरुपयोग अनुसन्धान आयोगको कार्यालय इटहरीले गत आर्थिक वर्षमा ६९.१३ प्रतिशत प्रगति हासिल गरेको छ ।
३३ औँ स्थापना दिवसको अवसरमा सुनसरीको इटहरीमा आइतबार आयोजनामा गरिएको कार्यक्रममा जानकारी दिदै गत बर्षमा ६९.१३ प्रतिशत प्रगति हासिल गरिएको इटहरीका कार्यालय प्रमुख सुरेश न्यौपानेले बताउनुभयो ।
गत आर्थिक वर्षमा प्रारम्भिक छानबिन तर्फ जम्मा २ हजार ४०७ उजुरी रहेकोमा सो मध्ये १६६४ फर्छ्यौट हुँदा ६९.१३ प्रतिशत प्रगति हासिल भएको उहाँले जानकारी दिनुभयो । जस मध्यै १५५ वटा उजुरीमा विस्तृत अनुसन्धान अधिकृत तोकिएको, ८७३ वटा उजुरी तामेलीमा राखिएको, १४ वटा उजुरी उपर सुझाव दिइएको र ६२२ वटा उजुरी उपर कानुन बमोजिम अन्य आवश्यक कारवाहीका लागि विभिन्न निकायमा लेखी पठाइएको उहाँले जानकारी दिनुभयो ।
गत आर्थिक बर्षमा फर्छ्यौट हुन बाँकी रहेका ७४३ उजुरी चालु आर्थिक बर्ष ०८०÷८१ मा जिम्मेवारी सरेर आएको आयोगका इटहरी कार्यालय प्रमुख न्यौपानेले बताउनुभयो । सुधारौँ सोच, संस्कार र व्यवहार, नियन्त्रण हुन्छ भ्रष्टाचार भन्ने मूल नाराका साथ आयोगको ३३ औँ स्थापना दिवसमा निबन्ध प्रतियोगितामा सहभागी विजयी छात्रछात्रालाई पुरस्कृत समेत गरिएको छ ।
निबन्ध प्रतियोगितामा प्रथम स्थान हासिल गर्ने ग्लोबल एजुकेशनल एकेडेमी दमक झापाकी कृतिशा भण्डारी, दोस्रो हुने सैनिक आवसिय विद्यालय, धरान सुनसरीका प्रिन्स श्रेष्ठ र धुलाबारी मावि झापाका दिक्षा प्याकुरेललाई पुरस्कृत गरिएको थियो ।
प्रथम, द्धितिय र तेस्रो हुनेलाई कार्यक्रमका प्रमुख अतिथि कोसी प्रदेशका प्रमुख पर्शुराम खापुङले क्रमशः नगद २० हजार, १५ हजार र १० हजार प्रदान गर्नुभएको थियो ।
