टोमराज मेहता
इनरुवा । कोशी प्रदेशका प्रहरी प्रमुख प्रहरी नायव महानिरीक्षक चन्द्र कुबेर खापुङले धार्मिक गतिवधिले प्रहरी र सामुदायबीचको आपसी सदभाव कायमसँगै भाइचारा, बन्धुत्वको विकास र सदाचारले निष्ठवान सेवा गर्न थप योगदान पुग्ने बताउनुभयो ।
सुनसरीको हरिनगर गाउँपालिका–४ स्थित इलाका प्रहरी कार्यालय हरिनगराको प्राङ्गणमा भगवति मन्दिरको समुदघाटन कार्यक्रमलाई सम्वोधन गर्नुहुँदै उहाँले प्रहरी र समुदायबीचको सम्बन्धले प्रहरीको सेवा प्रभावकारी हुने बताउनुभयो ।
कोशी प्रदशेका प्रहरी प्रमुख खापुङ्गले इलाका प्रहरी कार्यालय हाताभित्र मन्दिर निर्माणले पनि प्रहरी र समुदायबीचको सम्वन्धलाई मजबुत बनाउनेमा मदत पुग्ने बताउनुहुँदै उहाँले धर्मको रक्षा गर्नु हामी सबैको कर्तब्य भएको बताउनुभयो ।
उहाँले प्रहरी र समुदायबीचको समन्वय र सहकार्य आवश्यक रहेको बताउनुभयो । प्रहरी सधैं जनताको सहयोगी र सेवकको रुपमा काम गर्दै आइरहेको हुदाँ आगामी दिनमा समन्वय र सहकार्यका लागि कोशी प्रदेश प्रहरी कार्यालय तत्पर रहेको उहाँले बताउनुभयो ।
त्यसैगरी हरिनगर गाउँपालिकाका अध्यक्ष हाजी गफार अन्सारीले सामाजिक सदभावलाई कायम गर्न सबैले आ–आफनो ठाउँबाट भूमिका निर्वाह गर्नुपर्ने बताउनुभयो । पालिकाभित्र एकता, समन्वय र सहकार्यले कुनै पनि हिन्दु र मुस्लिम समुदायबीच अप्रिय घटना नभएको बताउनुभयो ।
पालिका अध्यक्ष अन्सारीले आफू दोस्रो कार्यकालमा कुनै पनि धर्मलाई उपेक्षा नगरिएको बताउनुहुँदै उहाँले सबै जातजाति, धर्मसंस्कृति, भेषभुषा र संस्कारलाई सम्मान र सदभाव कायम गर्दै आएको बताउनुभयो । पालिकामा मन्दिर निर्माण लगायत स्वास्थ्य,शिक्षा र पूर्वाधार विकासतर्फ आफू लागि परेको समेत जानकारी दिनुभयो ।
७ लाख ११ हजार भन्दा बढी रकम संकलन गरेर मन्दिर निर्माण सम्पन्न गरिएको मन्दिर समितिका राजेश कुमार पालले जानकारी दिनुभयो । जनश्रमदानबाट रकम संकलन गरेर उदाहरणीय काम गरेको चर्चा गर्नुहुँदै उहाँले सहयोगी हातहरुलाई धन्यवाद दिनुभयो ।
हरिनगर गाउँपालिकाकी उपाध्यक्ष रिमझिम कुमारी भगतको अध्यक्षतामा कार्यक्रम सम्पन्न भएको थियो ।
कार्यक्रममा जिल्ला प्रहरी कार्यालय सुनसरीका प्रमुख वीपीन रेग्मीले स्वागत मन्तब्य राख्नुभएको थियो । सुनसरीका प्रमुख जिल्ला अधिकारी जयनारायण अचार्य, हरिनगर–४ का वडा अध्यक्ष देव नारायण मेहता लगायतका बिभिन्न सरोकारवालाको सहभागिता रहेको थियो ।
ईलाका प्रहरी कार्यालय हरिनगरा हाताभित्र स्थित भगवति मन्दिरमा आर्थिक सहयोग गर्नेहरुलाई दोसल्ला र सम्मान पत्रले कोशी प्रदेश प्रहरी प्रमुख खापुङ, हरिनगर गाउँपालिकाका अध्यक्ष हाजी अन्सारी र सुनसरीका प्रमुख जिल्ला अधिकारी अचार्य र सुनसरीका प्रहरी प्रमुख रेग्मी लगायतकाले उनीहरुलाई सम्मान गर्नुभएको थियो ।
