इनरुवा । नेपाल–भारतको सीमा जोडिने सुनसरी जिल्लाको मुख्य नाका कोशी गाउँपालिका वडा नम्बर–८ भण्टाबारीस्थित रहेको तीनकुनेमा आज राष्ट्रिय झण्डा फहराइएको छ ।
कोशी गाउँपालिका वडा नम्बर–८ भण्टाबारीस्थित तीनकुने नाकामा सुनसरीको प्रमुख जिल्ला अधिकारी जयनारायण आचार्यको बिशेष पहल र कोशी गाउँपालिकाको सहयोगमा निर्माण गरिएको राष्ट्रिय झण्डा फहराइएको हो ।
कोशी प्रदेशसभा सदस्य हाजी इस्राइल मन्सुरी, नेपाली कांग्रेस सुनसरीका सचिव बीरेन्द्र शाह, कोशी गाउँपालिकाका अध्यक्ष ऐयुब अन्सारी, उपाध्यक्ष अनितादेवी यादव, सुनसरीका प्रहरी प्रमुख प्रहरी उपरीक्षक बीपिन रेग्मी, सशस्त्र प्रहरी प्रमुख, सुनसरी भन्सार कार्यालयका निमित्त प्रमुख लगायतको उपस्थितीमा सुनसरीका प्रमुख जिल्ला अधिकारी आचार्याले राष्ट्रिय झण्डा फहराउनुभएको हो ।
राष्ट्रिय झण्डार सबै नेपालीको मान, सम्मान एवं स्वाभिमान प्रतिविम्ति गर्ने भएकाले आवश्यकता अनुसार निर्माण गरिएको बताउँदै प्रमुख जिल्ला अधिकारी आचार्यले सीमा नाकामा देखिएको समस्या समाधान गर्नेतर्फ आफ्नो ध्यान केन्द्रित रहेको बताउनुभयो ।
सुनसरीमा प्रमुख जिल्ला अधिकारीको रुपमा आएपछि उहाँ नेतृत्वको टोलिले सीमा नाकाको अवस्था बुझदै समस्या पहिचान गर्न पाँच दिने पैदल यात्रा गरेको थियो । आगामी दिनमा पनि सुनसरीका बिभिन्न सीमा नाकामा राष्ट्रिय झण्डा राख्ने सुनसरी प्रशासनले जनाएको छ।
सोही अवसरमा कोशी गाउँपालिकाका अध्यक्ष ऐयुव अन्सारी बोल्नुहुँदै सीमामा तैनाथ सुरक्षाकर्मीले निकै चुनौतीका बाबजुत चुस्त दुरुस्त तवरबाट सुरक्षा दिँदै आएको बताउनुभयो । उहाँले दोस्रो कार्यकालमा पनि आफू निर्वाचित भएदेखि सुरक्षाकर्मीको व्यारेक भवन निर्माण गर्नेदेखि आवश्यकता अनुसारको सहयोग गर्दै आएको बताउनुभयो ।
