इनरुवा । सुनसरीको बर्जु गाउँपालिकाका आगलागी पीडित परिवारलाई हरिनगर गाउँपालिकाका अध्यक्ष हाजी गफार अन्सारीले व्यक्तिगत तर्फबाट राहत सामग्री वितरण गर्नुभएको छ ।
बर्जु गाउँपालिकाको वडा नं-४ स्थित जयनगर मुस्लिम टोलमा गत आइतबार भएको आगलागीबाट पीडित १६ घर परिवारलाई राहत सामग्री वितरण गरिएको अध्यक्ष अन्सारीले जानकारी दिनुभयो ।
अग्नि पीडित परिवारहरुलाई पानी खानको लागि ४ थान टुबेल दिने अध्यक्ष अन्सारीले अश्वासन दिनुभयो । आगलागीबाट पीडित १६ घर परिवारलाई बर्जु गाउँपालिकाको समन्वयमा राहत सामग्री वितरण गरिएको हो ।
जयनगर मुस्लिम टोलका स्थानीय बिसुनदेव पौदारको घरबाट आगलागी सुरु भएको थियो । अधिकांश घर एक आपसमा टाँसिएका र बाँस, फुस जस्ता सामग्री प्रयोग गरी बनाइएका भएकाले आगो चाँडैतिर फैलिएर धेरै घरमा क्षति भएको सुनसरी प्रहरीले जनाएको छ ।
आगालागिमा घरसहित स्थानीयको अन्न,लत्ताकपडा लगायत धनमाल जलेर नष्ट भएको थियो ।१६ घरपरिवारलाई जनही चामल एक बोरा २५ किलो, खाने तेल एक लिटर, दाल एक किलो र नुन लगायतका दैनिक उपभोग्य सामग्री प्रदान गरिएको अध्यक्षका स्वकीय सचिव शमिम अन्सारी बताउनुभयो ।
राहत सामग्री वितरण कार्यक्रममा हरिनगर गाउँपालिकाका अध्यक्ष हाजी गफार अन्सारी, नेपाली काँग्रेस सुनसरी क्षेत्र नम्बर ४ प्रदेश (ख) का सचिव नईम अन्सारी, बर्जु गाउँपालिका कार्यवाहक अध्यक्ष नितु कुमारी चौधरी, पूर्व बर्जू गाउँपालिका अध्यक्ष रधुनन्दन चौधरी लगायतको उपस्थिति रहेको थियो ।
