इनरुवा । सन्तावन्न युवा क्लबले होलि हंगामा कार्यक्रम हिजो सम्पन्न गरेको छ । सन्तावन्न युवा क्लब इनरुवा सुनसरीको आयोजना र गोल्डेक ओकेको सहयोगमा इनरुवा–१ स्थित दुहबी टेम्पो स्टेण्डमा होलि हंगामा कार्यक्रम सम्पन्न गरेको हो ।
होलि हंगामा कार्यक्रमका प्रमुख अतिथि नेपाली कांग्रेसका केन्द्रिय सदस्य राजीव कोइरालाले कार्यक्रमलाई सम्वोधन गर्नुहुँदै होली पर्व एक धार्मिक र सांस्कृतिक पर्व भएको बताउनुभयो । यो पर्वलाई नेपाली समाजले हरेक वर्ष पारिवारिक स्नेह, पारस्परिक एकता र सामाजिक सद्भावका साथ मनाउँदै आएको उहाँले बताउनुभयो ।
वसन्त ऋतुको आगमनसँगै आपसी मेलमिलाप र सद्भावनाको सन्देश लिई आएको होली पर्वले सबैको घरपरिवारमा सुख, शान्ति र समृद्धिको वातावरण सिर्जना गर्दै पारस्परिक एकता र सामाजिक सद्भाव अभिवृद्धि गर्न सबैलाई प्रेरित गर्न सकोस् भन्दै केन्द्रिय सदस्य कोइरालाले सबैमा शुभकामना व्यक्त गर्नुभएको थियो ।
जिल्ला समन्वय समिति महासंघका केन्द्रिय सभापति तथा जिल्ला समन्वय समिति सुनसरीका सभापति राजन मेहताले होलि पर्वले सामाजिक सदभाव र भाइचारा सम्वन्ध स्थापित गरेको बताउनुभयो ।
त्यसैगरी इनरुवा नगरपालिकाका उपप्रमुख बिनिता मेहताले होली पर्वले एक आपसमा रहेको तिक्तालाई होलीको रङ्ग र अविरले धार्मिक र सांस्कृतिक सम्वन्धलाई प्रगाढ बनाउन मदत गरेको बताउनुभयो । जुनसुकै क्षेत्रमा बस्ने नेपालीलाई पनि होली पर्वले आपसी सद्भाव र एकता अभिवृद्धि गर्न सहयोग गरेको उपप्रमुख मेहताले बताउनुभयो ।
सन्तावन्न युवा क्लबवका अध्यक्ष सत्य नारायण यादवको अध्यक्षतामा सम्पन्न भएको कार्यक्रममा संविधान सदस्य सीताराम मेहता, सुनसरीका प्रमुख जिल्ला अधिकारी जय नारायण आचार्य, उधोग वाणिज्य संघ इनरुवाका अध्यक्ष बीरेन्द्र शाह लगायतका युवा, व्यापारी, बुद्धिजिवी, नागरिक समाज, सञ्चारकर्मीहरुको सहभागिता रहेको थियो । कार्यक्रम सन्तावन्न युवा क्लबका महासचिव बिकेश मेहताले सञ्चालन गर्नुभएको थियो ।
