इनरुवा । नेपाली काङग्रेसका उपसभापति तथा पूर्वमन्त्री धनराज गुरुङ्गले काङग्रेस बलियो भयो भने मात्र लोकतन्त्र बलियो हुने बताउनुभएको छ ।
सुनसरीको इटहरी उपमहानगरपालिकामा शुक्रबार नेपाल प्रेस युनियन सुनसरी शाखाले आयोजना गरेको लोकतन्त्रमा सञ्चार माध्यमको भुमिका बिषयक अन्तक्रिया कार्यक्रमलाई सम्बोधन गर्नुहुदै उहाँले सो कुरा बताउनुभएको हो ।
लोकतन्त्रलाई बलियो र मजबुत बनाउनका लागि सबैले एक ढिक्का भएर लाग्नुपर्नेमा उहाँले जोड दिनुभयो । काङग्रेसको टिकटबाट निर्वाचित जनप्रतिनीधिले कुनै पनि प्रश्न नउठने गरि काम गर्नुपर्नेमा उपसभापति गुरुङ्गले उल्लेख गर्नुभयो ।
नेपाली काङग्रेसको टिकटबाट निर्वाचित भएका वडा सदस्य देखि प्रधानमन्त्री सम्मले जनताले प्रश्न नउठाउने गरि काम गरेको खण्डमा मात्र काङग्रेस बलियो हुने र काङगे्रेस बलियो भयो भने मात्र लोकतन्त्र बलियो हुने उपसभापति गुरुङ्गले बताउनुभयो ।
उहाँले नेपाली काङग्रेसको टिकटबाट निर्वाचित भएका सबै जनप्रतिनीधि देखि प्रधानमन्त्री सम्मको सम्पति छानविन गर्नुपर्नेमा जोड दिनुभयो । पार्टी भित्रको नीतिगत र रणनीतिगत छलफल कहाँ गर्ने बिषयमा सबैले सोच्नुपर्ने बेला आएको उहाँले बताउनुभयो ।
नेपाली काङग्रेसका नेता तथा कार्यकर्ताले कति बेला प्राविधिक कुरा गर्ने र कति बेला नीतिगत कुरा गर्ने बिषयमा अल्झीने गरेका कारणले पटक–पटक समस्या उत्पन्न हुने गरेको उहाँले जिकिर गर्नुभयो । कार्यक्रममा कोसी प्रदेशका मुख्यमन्त्री केदार कार्कीले वर्तमान सरकारले नै निरन्तरता पाउने बताउनुभएको छ ।
उहाँले केन्द्रिय सत्ता समिकरण फेर बदल हुदैमा कोसी प्रदेश सरकारलाई केही असर नहुने दाबी गर्नुभयो । उहाँले भन्नुभयो, “बाग्मतीमा स्याल कराउदा कोसीमा स्याल कराउदैन यहाँ अर्ना कराउन सक्छ ।” कोसी प्रदेश सरकारले अहिले मध्यावधिक निर्वाचन नगर्ने बताउनुहुदै विश्वासको मत समेत २ बर्ष सम्म नलिने मुख्यमन्त्री कार्कीले दाबी गर्नुभयो ।वर्तमान कोसी सरकार कुनै पनि हालतमा नढल्ने बताउनुहुदै मुख्यमन्त्री कार्कीले संविधानमा उल्लेख भए अनुसार अगाडि बढनेमा ढुक्क हुनका लागि सबैलाई आग्रह गर्नुभयो ।
कार्यक्रमलाई सम्बोधन गर्नुहुदै नेपाली काङग्रेका केन्द्रिय सदस्य राजिव कोइरालाले पछिल्लो समय देशमा नकारात्मक शक्तिको सञ्चार भइरहेका बेलामा सञ्चार माध्यमले यसलाई चिर्नका लागि कलम चलाउनुपर्नेमा जोड दिनुभयो । नेपालमा बौद्धिक अपराधि र बौद्धिक अराजकता बिरुद्ध सञ्चारकर्मीले लोकतन्त्रको रक्षा गर्दै कलम चलाउनुपर्नेमा उल्लेख गर्नुभयो ।
कार्यक्रममा नेपाली काङग्रेसका केन्द्रिय सदस्य लक्ष्मी खतिवडा, इनरुवा नगरपालिकाका प्रमुख केदार भण्डारी, नेपाल पत्रकार महासंघका पूर्व केन्द्रिय अध्यक्ष तारानाथ दाहाल, प्रेस युनियनका केन्द्रिय अध्यक्ष शिव लम्साल लगायतको सहभागीता रहेको थियो ।
कार्यक्रममा सुनसरीका अग्रज पत्रकार हर्ष सुब्बा, नेपाल पत्रकार महासंघका केन्द्रिय सदस्य इकवाल अहमद, प्रेस युनियनका पूर्व केन्द्रिय सदस्य हेमराज दाहाल, दिवस पोखरेल लगायतलाई सम्मान गरिएको थियो ।
कार्यक्रम प्रेस युनियन सुनसरीका अध्यक्ष ध्रुव ढकालको अध्यक्षतामा सम्पन्न भएको प्रेस युनियन सुनसरीका सदस्य नसिम अंसारीले जानकारी दिनुभयो ।
