इनरुवा । महिला, बालबालिका तथा जेष्ठ नागरिक मन्त्री भगवती चौधरी सहितको टोलीले गत चैत ४ गते सुनसरी स्थित बर्जु गाउँपालिका–४ जयनगर मुस्लिम टोलमा भएको आगलागी क्षतिको निरिक्षण गर्नुभएको छ ।
निरिक्षणपछि उक्त आगलागीबाट घरबास गुमाएका परिवारलाई बिभिन्न संघ सस्थासंग सहकार्य गरेर घर बनाई दिने महिला, बालबालिका तथा जेष्ठ नागरिक मन्त्री चौधरीले घोषणा गर्नुभएको हो ।
प्रवासी नेपाली संघ (एन आर एन ए) तथा ताइवानी सस्था (चुजी फाउन्डेसन) सँगको सहकार्यमा घर बास गुमाएका करिब २७ घर परिवारको पुनर्वासको निम्ति आवश्यक घर तथा स्कुल निर्माण गरिदिने घोषणा गर्दै मन्त्रि चौधरीले भन्नु भयो, ‘नेपाल सरकार सबै दात्री निकायसँग सहकार्य गर्दै पीडितको पुनर्बासको निम्ति आवश्यक काम गर्न तयार छ ।’
आगलागीबाट जलेका २७ घरटहराको क्षति निरिक्षणका क्रममा आगलागी बाट जोगिन बिभिन्न उपाय अपनाउनु पर्ने, कहिले काँही जतिनै सचेत हुँदा हुँदै पनि आगलागी हुन् सक्छ त्यो दैविक प्रकोप भनौ वा बिपत्ती, यस बिपत्ती प्रति दुख व्यक्त गर्दै पीडितका पीडामा मलहम लगाउन आफुँ यहाँ आएको भन्दै आफु लाई एक्लो महसुस नगर्न र साथमा सरकार रहेको भन्दै पीडितलाई सबैको सहयोगमा जतिसक्तो चाडो एकै किसिमका घर वनाईदिने मन्त्री चौधरीले प्रतिवद्दता जनाउनु भएको छ ।
मन्त्रि चौधरीबाट आफुहरुले धेरै आशा अपेक्षा राखेको भन्दै पीडितहरुले आफुहरुको पुनर्बास र जीवन रक्षाको निम्ति आवश्यक पहल गरिदिन अनुरोध गरेसँगै उहाँले प्रतिवद्दता जनाउनु भएको हो । कार्यक्रममा बोल्दै प्रदेस सभा सदस्य रोहित बहादुर कार्कीले आफु संघीय सरकार र स्थानीय सरकार संग सहकार्य गर्दै पीडितको गाँस, बासको निम्ति जस्तो सुकै कार्य गर्न तयार रहेको बताउनु भयो ।
यसैगरी गैर आवासीय नेपाली संघका प्रमुख कार्यकारी अधिकृत राजेन्द्र कुमार राउत, गैर आवासीय नेपाली संघका अन्तरराष्ट्रिय समन्वय समितिका महिला संयोजक राधिका गुरुङ, उपध्यक्ष रोजिना राई, कार्यक्रममा समाज कल्याण परिसदका सदस्य सचिव मनोज भट्ट, चुजी फाउन्डेसनका निर्देशक डा.निर्देश शाक्य लगायतको सहभागिता रहेको थियो । यस अघि नै मन्त्री चौधरीको पहलमा नेपाल रेडक्रस सोसाइटीले पीडित १६ घर परिवारका लागि आवश्यक राहत सामग्री वितरण गरिसकेको जनाएको छ ।
