इनरुवा, । सुनसरी सदरमुकाम इनरुवा–९ बबियाबाट बुधबार दिउसो हतियार देखाएर लुटपाट भएको छ ।
मोटरसाइकलमा आएका अज्ञात समुहले बबियाबाट दिउसो हतियार देखाएर ५ लाख ३५ हजार लुटिएको छ । हरिनगर गाउँपालिका–२ का सदाम अन्सारीले इनरुवाबाट जग्गा बिक्रि गरेर घर तर्फ गइरहेका बेलामा ३ जना सवार भएर आएका अज्ञात समुहले बिबियामा सवारी रोकि हतियार देखाएर लुटपाट गरेर फरार भएको पीडितका बुबा सलामुद्धिन अंसारीले बताउनुभयो ।
सदामले हजुरआमा सैहरा खातुनको नाम रहेको जग्गा गढी गाउँपालिका सतेरझोराका विनोदलाई मालपोत कार्यालय इनरुवा सुनसरीमा पास गरेर उहाँबाट लिएको ५ लाख ३५ हजार रुपैयाँ लिइ घर जाने क्रममा अज्ञात समुहले हतियार देखाएर लुटपाट गरेको पीडित सदाम अंसारीले बताउनुभयो ।
पैसा लुटेर अज्ञात समुहले मोटरसाईकलमा सवार भई इनरुवा तर्फ आएको पीडित परिवारले जनाएको छ । यता सुनसरीका प्रहरी नायव उपरीक्षक नविनकृष्ण भण्डारीले बबियामा लुटपाट भएको कुरालाई पुष्टि गर्नुभएको छ । लुटपाटको घटनामा संलग्न भएकाको सुक्ष्म ढङगले खोजी कार्य भइरहेको सुनसरीका प्रहरी नायव उपरीक्षक भण्डारीले बताउनुभयो ।
घटनामा संलग्न भएका व्यक्तिको खोजी भइरहेको बताउनुहुदै दोषीलाई एक/दुई दिन भित्रै कानुनी दायरामा ल्याउने प्रहरी नायव उपरीक्षक भण्डारीले जानकारी दिनुभयो ।
