इनरुवा । सुनसरीको कोसी गाउँपालिका-४ स्थित कोसी कटानमा निर्माण भइरहेको कोसी प्रदेश सरकारको गौरवको आयोजना रिफ्रेसमेन्ट सेन्टरको मुख्यमन्त्री हिक्मतकुमार कार्कीले बिहिबार अनुगमन निरीक्षण गर्नुभएको छ ।
पटक-पटक सरकार परिवर्तन भएपछि कोशी प्रदेशको पहिलो सरकारले गौरवशाली आयोजनाको रुपमा अगाडि बढाएको कोसी रिफ्रेसमेन्ट सेन्टरको काम अहिले अलपत्र अवस्थामा रहेको छ ।
पाँच वर्षअघि तत्कालीन मुख्यमन्त्री शेरधन राई नेतृत्वको सरकारले सुनसरीको कोशी गाउँपालिकाको कोशी कटान क्षेत्रमा प्रदेशकै गौरवशाली बहुवर्षीय आयोजनाको रुपमा कोशी रिफ्रेसमेन्ट सेन्टर निर्माण अघि बढाएपनि कामले गति लिन नसकेको स्थानीय भरत झाले जानकारी दिनुभयो ।
आयोजनाको प्रगति सन्तोषजनक नभएपछि तत्कालीन आन्तरिक मामिला तथा कानुनमन्त्री रहेका कार्कीले मुख्यमन्त्री बनेपछि आयोजनाको प्रगतिबारे चासो राख्दै बिहीबार अनुगमन गर्नुभएको हो ।
तत्कालीन मुख्यमन्त्री राईले आयोजनाको कामका लागि छुट्टै कार्यालय स्थापना गरेर निर्माण कार्य अगाडि बढाउनु भएको थियो । त्यसपछि नेकपा एकीकृत समाजवादीका राजेन्द्र राई नेतृत्वको सरकारले कार्यालय खारेज गरेपछि आयोजनाको काम अलपत्र परेको थियो ।
राजेन्द्र राई नेतृत्वको प्रदेश मन्त्रिपरिषद् बैठकले सुनसरीको इनरुवामा रहेको सेन्टरको कार्यालय खारेज गरेर रिफ्रेसमेन्ट सेन्टर निर्माणको काम सहरी विकास कार्यालय मोरङले हेर्ने निणर्य गरेसँगै काम अलपत्र परेको थियो ।
अहिलेसम्म जग्गा खरिद गरेर संरचना निर्माणको कामलाई अगाडि बढाइए पनि बजेट अभावले थप प्रगति हुन सकिरहेको छैन । दुई अर्ब रुपैयाँ अनुमानित लागतमा तीन वर्षमा सकाउने लक्ष्य रहेको परियोजनाको पहिलो चरणमा २७ करोड ५ लाख १९ हजार रुपैयाँ बराबरको काम थालिने बताइएको थियो ।
