भुटाहा,। सुनसरीकाे हरिनगर गाउँपालिका–१ स्थित भुटाहामा मुस्लिम समुदायद्वारा वर्षाका लागि सामूहिक दुवा माग्दै नमाज पढेका छन् ।
सुनसरी जिल्ला लगायतका विभिन्न क्षेत्रमा जमिन सुक्दै गएका छन् भने धानको बाली सखाप हुने अवस्थामा पुगेको छ। यस्तो अवस्थामा राहतको आशामा यहाँको मुस्लिम समुदायले आज विशेष धार्मिक अनुष्ठान “नमाजे इस्तिस्का” सामूहिक रूपमा सम्पन्न गरेका छन्।
भुटाहा इदगाह मैदानमा आज बिहान ९ बजेदेखि मुस्लिम समुदायका हजारौं व्यक्तिहरु भेला भई अल्लाहसँग वर्षाका लागि विशेष नमाज अदा गरेका हुन्।
‘नमाजे इस्तिस्का’ मुस्लिम धर्मअनुसार खडेरी वा पानीको अभावमा वर्षाका लागि अल्लाहसँग माग गर्ने नमाज हो।
स्थानिय धार्मिक अगुवाहरूका अनुसार, प्राकृतिक प्रकोप वा वर्षा नपरेका बेला यो विशेष नमाज पढ्ने परम्परा इस्लाम धर्ममा लामो समयदेखि रहिआएको छ।
कार्यक्रममा सहभागी एक स्थानिय व्यक्तिले भने, “बाली नासिन थालिसक्यो, इनार र पोखरीहरू सुकेका छन्, अब अल्लाहकै सहारामा छौं।”
यस धार्मिक कार्यक्रममा पुरुष बालबालिका समेतको उल्लेख्य उपस्थिति देखिएको थियो। स्थानीय समाजसेवीहरू र धर्मगुरुहरूको संयोजनमा शान्तिपूर्ण ढंगले सम्पन्न उक्त नमाजपछि सहभागीहरूले एक आपसमा सहयोग गर्दै प्राकृतिक संकट पार गर्ने अठोट पनि व्यक्त गरेका छन्।
मौसम विभागले हालसम्म उल्लेखनीय वर्षाको पूर्वानुमान नगरे पनि कृषकहरू प्राकृतिक कृपाका लागि आशावादी देखिएका छन्।
