सुनसरी । कोशी प्रदेशका मुख्यमन्त्री केदार कार्कीले आवश्यकता परेको जुनसुकै बेला मन्त्रिमण्डल विस्तार हुने बताउनुभएको छ ।
सुनसरीको देवानगंज गाउँपालिकामा स्वागत सम्मान तथा नमो अनलाइन डटकम न्युज पोर्टल शुभारम्भ कार्यक्रमलाई सम्वोधन गर्नुहुँदै मुख्यमन्त्री कार्कीले कोशी प्रदेशमा काम गर्न र सरकार चलाउन अप्ठयारो नभएकाले आवश्यकता परेको खण्डमा मन्त्रिमण्डल विस्तार गर्ने बताउनुभयो ।
मानवीय विकास कोशी प्रदेश सरकारको प्राथमिकतामा रहेको उहाँले बताउनुभयो । प्रदेश सरकारले एक पालिकाबाट एक जना कृषि र एक जना पशु विषयमा अध्ययनका लागि छात्रबृतिमा यसै वर्षदेखि उपलब्ध गराउने उहाँले बताउनुभयो । टिवनमैत्री, वातावरणमैत्री बनाउन कोशी सरकारको ध्यान केन्द्रित भएकोमा उहाँले जोड दिनुभयो ।
यो सरकार गरिबको घरमा जान चाहेको छ, उहाँले भन्नुभयो, विगतका सरकारले धनिको घरघरमा पुगेर बाटो, नाला, सामुदायिक भवन बनाउनेमा मात्रै पैसा लगायो । तर यो सरकारले नागरिकको उपचारमा खर्च गर्नेछ । कोशी प्रदेशमा १० मुनिका बालबालिकाहरुलाई कोशी प्रदेश सरकारले निःशुल्क उपचार गर्छ, अब ऋण खोज्नुपर्दैन् ।
कोशी प्रदेशका मुख्यमन्त्री कार्कीले एमालेको समर्थनमा मुख्यमन्त्री भएपनि काम गर्ने शैली फरक रहेको बताउनुहुँदै एमाले बृद्धभत्ताको कुरा लिएर चुनावमा भोट बढाएको तर देश बचाउन नसकेको उहाँले बताउनुभयो ।
महिला स्वंयसेविकाहरुलाई सरकारले सम्मान गर्ने र मासिक तलब बृद्धि गर्ने पनि उहाँले बताउनुभयो । शिक्षा, स्वास्थ्य र कृषि क्षेत्रलाई प्राथमिकता दिदै सबै पार्टीलाई एकीकृत गर्दै सबैलाई सरकारको अनुभुति हुने गरी विकासको गति दिन लागि परेको मुख्यमन्त्री कार्कीको भनाई छ ।
सुनसरीको दक्षिणवर्तीलाई कृषि र उधोगको क्षेत्रलाई मजबुत बनाउनुपर्नेमा मुख्यमन्त्री कार्कीले जोड दिनुभयो । विगतका दिनहरुमा विकासका लागि शहर हेरिने प्रचलनलाई चिर्दै गाउँबाट शहरलाई विकासको टेवा दिनुपर्नेमा उहाँले जोड दिनुभयो ।
रेडियो नागरिकका संचालकतथा ग्रामीण खबरका अरबिन्द कुमार मेहताको अध्यक्षतामा सम्पन्न भएको कार्यक्रममा पूर्व राज्यमन्त्री सीताराम मेहता, नेपाली काङ्ग्रेस केन्द्रिय सदस्य राजिव कोइराला, कोशी प्रदेशसभा सदस्य इस्राइल मन्सुरी, कोशी प्रदेश सभा सदस्य राम प्रसाद मेहताको सहभागी रहेको थियो ।
त्यसैगरी कोशी प्रदेश प्रहरी प्रमुख प्रहरी नायव महानिरीक्षक राजेशनाथ बास्तोला, सुनसरी सहायक जिल्ला अधिकारी ओम प्रसाद ढकाल , सुनसरी प्रहरी प्रमुख विपिन रेग्मी , सस्त्र प्रहरी जिल्ला प्रमुख लकेश कुमार तुम्वाहाम्फे , इनरुवा नगरपालिका मेयर केदार भण्डारी ,नेपाली काङ्ग्रेस क्षेत्रिय सभापति श्याम लाल मेहता ,हरिनगर गाउँपालिका अध्यक्ष गफार अन्सारी , देवानगन्ज गाउँपालिका अध्यक्ष बेचन प्रसाद मेहता, उपाध्यक्ष विभा कुमारी यादव, बर्जु गाउँपालिका अध्यक्ष जिवछ राय, लगायतको सहभागिता रहेको थियो ।
