मुनाफा हसन
इनरुवा । सुनसरी जिल्लाभित्र रहेका अति विपन्न समुदाय मुसहरहरु जिल्लाभित्र संगठित हुने अभियानमा लागेका छन् ।
सो अभियानअन्र्तगत इनरुवामा आयोजित राष्ट्रिय मुसहर संघको कार्यक्रममा सरोकारवालाहरुले हरेक क्षेत्रमा मुसहरहरुलाई अवसर दिनुपर्ने माग गर्दै हरेक क्षेत्रमा मुसहर समुदायलाई विभिन्न राजनीतिक दलले प्रयोग गर्ने भाँडो बनाएको आरोप कार्यक्रमका वक्ताहरुले लगाएका छन् ।
नेपाल राष्ट्रिय मुसहर संघ जिल्ला स्तरीय विशाल आमसभा नामक सो कार्यक्रमलाई सम्बोधन गर्दै मुसहर समुदायका अगुवा तथा संघका केन्द्रीय महासचिव रामस्वरुप सदाले हरेका निकायमा आफूहरुको समुदायको क्षमता र योग्यताअनुसार अवसर दिनुपर्ने माग गर्दै हालसम्म सुनसरीमा मुसहर समुदायलाई विभिन्न राजनीतिक दल र नेताहरुले भीडका लागि प्रयोगमात्र गरेको प्रति खेदसमेत व्यक्त गरेका छन् ।
शनिबार आयोजित मुसहर जनजागरण कार्यक्रमअन्तर्गत आयोजित विशाल आमसभामा सदायले अरु समुदायले मुसहरलाई प्रयोग मात्रै गरेको र भोटबैंकको रुपमा लिएकाले मुसहरहरु पछाडि पर्दै गएको दाबी गर्दै राज्यको हरेक निकायमा अवसर दिनुपर्ने मागसमेत गरे ।
सदायले मुसहरहरुलाई सरकारदेखि राजनीतिक दलसम्मले सभा, जुलुस, भेला र ठूलावडालाई स्वागत गर्ने कामबाहेकमा अवसर नदिएकाले समुदाय पछि परेको प¥यै भएको गुनासो गर्दै सबै क्षेत्रमा मुसहरहरुको सहभागिता जरुरी रहेको मागसमेत गरे ।
कार्यक्रममा संघका केन्द्रीय सदस्य बद्री सदाले दलहरुको हरेक कार्यक्रममा भीडभाडका लागि मुसहरहरुलाई प्रयोग गर्ने गरेको भए पनि सोही दलहरुले निर्वाचित भएपछि आफ्नो जाति, पार्टी, नातागोता र आफन्तलाई मात्रै अवसर दिने गरेको भन्दै त्यस्तो कार्यको विरोध गर्न जरुरी रहेको बताए ।
अर्का केन्द्रीय सदस्य घोघाई ऋषिदेवले मुसहर समुदायलाई सुनसरीका १२ वटै स्थानीय तहमा उपेक्षा गरेको गुनासो गरेका छन् । स्थानीय तहको निर्वाचनपछि जिल्लामा पालिकाहरुले चार सयभन्दा बढी कर्मचारी आन्तरिक स्रोतबाट नियुत्तmि गर्दासमेत एकै जना मुसहरलाई पनि अवसर नदिएको दाबी गरे ।
मुसहर समुदायका युवा नेता रञ्जित सदाले निर्वाचनको बेला दलहरुले रक्सी र मासुमा मुसहरहरुलाई खरिद बिक्री गर्ने गरेको आरोप लगाउँदै त्यसबाट मुसहर समुदाय नै जोगिन आवश्यक रहेको बताए ।
सोही कार्यक्रममा प्रमुख अतिथिसमेत रहेका इनरुवा नगरपालिकाका नगरप्रमुख राजन मेहताले मुसहर समुदायसमेत देशको नागरिक भएकाले उहाँहरुलाई आफूले उच्च सम्मान गर्दै आएको बताए । मेहताले राज्यले मुसहरहरुको हरेक कार्यमा सहयोग गर्नुपर्ने र शिक्षा, स्वास्थ्य र रोजगारसहितको निःशुल्क ग्यारेन्टी गर्नुपर्ने बताए ।
सहभागिहरुले पुस्तौदेखि भोग चलन गर्दै आएको जग्गाको लालपूर्जा पाउनुपर्ने, आवासको अधिकार सुनिश्चित गर्नुपर्ने, राजनैतिक रुपमा गरिने प्रयोगलाई बन्द गर्नुपर्ने माग गरेका थिए ।
उनीहरुले मुसहर आयोगको गठन तथा आफ्नो समुदायको सांस्कृतिक धरोहर सवरी माता र दिनाभद्रीका नामको जग्गा आफ्नै समुदायलाई उपलब्ध गराउनसमेत माग राखेका थिए ।
देशका २४ जिल्लामा करिब १२ लाखको संख्यामा मुसहरहरुको बसोवास रहे पनि राज्यले आफूहरुलाई नहेर्दा पुस्तौँदेखि चरम गरिबी, अशिक्षा, अन्याय, विभेद र अभावमा बाँच्नु परेको उनीहरुले बताएका छन् ।
सुनसरी जिल्लाका विभिन्न स्थानबाट आएका हजारभन्दा बढी मुसहर समुदायको सो कार्यक्रममा उपस्थिति रहेको थियो ।
