गनेश कुमार यादव
इनरुवा । सुनसरीको विभिन्न स्थानमा मिसावटयुक्त रसायनिक मलको बिग्बिगी बढेको छ ।
भुटाहा, हनिगरा, देवानगंज, हात्तिमुडा लगायतका विभिन्न स्थानबाट खरिद गरिएको रसायनिक मलमा नुन मिसावट गरी बेचिरहेको फेला परे पनि सम्वन्धीत निकाय मौन बसिरहेको छ ।
केहीदिन अघी सुनसरीको गढी गाउँपालिका ६ हात्तिमुडामा किसानहरुले किनेर लगेको रसायनिक मल पोटांसमा नुनमा रङ्ग मिसाएर डिएपीको बोरामा प्याक गरेको फेला परेको थियो ।
हात्तिमुडामा मात्र नभई सुनसरीको दक्षिणी भेगमा समेत रसायनिक मल पोटासमा नुनमा रङ्ग मिसाएको फेला परेको छ । मल किन्दा मलको बिल समेत दिन मान्दैनन् व्यापारी । जिदी गर्दा ‘माल राखिदिनुस् हामिलाई मल बेच्नु छैन’ भनी पसलबाट जान भन्ने गरेको किसानहरुले गुनासो गरेका छन् ।
किसानहरु मलको अभावमा दिन प्रतिदिन समस्या खेप्न बाध्य छन् भने केही पसलेहरुले मिसावटयुक्त मल दिएर किसानहरुलाई लुट्ने गरेका छन् ।
जनताको समस्या बुझ्ने र समस्याको समाधान कसरी हुन्छ, त्यतातिर स्थानिय सरकारको काम भएता पनि जनताले आफुहरुले किनेर ल्याएको रसायनिक मलमा नुन मिसावट गरेको कुरा जनप्रतिनिधीलाई जानकारी गराउँदा समेत जनप्रतिनिधीले “मल किन्न जाँदा मलाई सोधेर किन्नु भको थियो” भनेर प्रतिक्रिया दिए ।
किसानलाई ठगी गरिरहेको छ भन्दा “गएर व्यापारी लाई भन्नु, मेरो काम कस्ले मल किन्यो, कसले ठग्योे भनेर निरीक्षण गरर्ने होईन” भनेर गढी गाउँपालिका ६ का वडाअध्यक्ष बन्देश्वर मण्डलले गैरजिम्मेवार ढंगले किसानहरुलाई प्रतिक्रिया दिएको हात्तिमुडाका किसानले जानकारी दिए ।
किसानहरुका अनुसार हालसम्म कुनै सम्वन्धित निकायले रसायनिक मलमा नुन मिसावट गरी बेच्नेहरुलाई कानुनको दायरामा ल्याएको छैन नत कुनै अनुगमन नै गरेकोे छ । यस बिषयमा सम्बन्धित निकायले गम्भिरतापुर्वक ध्यान दिन जरुरी छ ।
