इनरुवा । नेपाली कांग्रेस सुनसरीको आयोजनामा इनरुवामा सन्त नेता कृष्ण प्रसाद भट्टराईको ९८ औं जन्मजयन्तीको अवसरमा दीप प्रज्वलन गरिएको छ ।
इनरुवाको लोकतान्त्रिक चौकमा भट्टराईको ९८ औं जन्मजयन्ती दीप प्रज्वलन गरी मनाएको हो । नेपाली कांग्रेसका संस्थापक सन्त नेता भट्टराईको जन्मजयन्तीको अवसरमा नेपाली कांग्रेस सुनसरीका नेता तथा कार्यकर्ताहरुले दीप प्रज्वलन गरी मनाएका हुन् ।
दीप प्रज्वलन कार्यक्रमलाई सम्वोधन गर्दै सुनसरी क्षेत्र नम्बर–२ का प्रतिनिधि सभा सदस्य सीताराम मेहताले नेपाली कांग्रेसका संस्थापक नेता भट्टराईको उल्लेखनीय भुमिकाका कारण कांग्रेसको संगठन मजबुत भएको बताए ।
विश्वमै सबैभन्दा पुरानो पार्टी नेपाली कांग्रेस भएका कारण नेता भट्टराईको त्याग, तपस्या र बलिदानबाट नयाँ पुस्ताले पाठ सिक्नुपर्ने उनले बताए । नेता भट्टराई पदको लागि होइन्, कांग्रेसको संगठनको लागि मात्र काम गर्ने साहसी र सन्त नेताका रुपमा चिनिएको हुनाले कांग्रेसको लागि ठुलो बलिदान दिएकै कारण मुलुकभरी नेता भट्टराईलाई सम्झनाका रुपमा दीप प्रज्वलन गरिएको उनले बताए ।
प्रजातन्त्रको लागि लड्ने योद्धाका रुपमा चिनिएको र पदको लोभमा नपरेको नेता भट्टराईले नेपाली कांग्रेसको संगठनलाई बलियो बनाउनका निमित भुमिका निर्वाह गरेका कारण सदैव सम्झनुपर्ने उनले बताए । नेपाली कांग्रेसको सम्पन्न १४ औं महाधिवेशनबाट चयन भएर आएका नयाँ नेतृत्वहरुले सबैलाई मिलाएर लैजाने उनले बताउँदै एक जुट भएर आउँदो स्थानिय तहको निर्वाचनमा सबै तहमा कांग्रेसलाई जिताउन आवश्यक रहेको बताए ।
त्यस्तै नेपाली कांग्रेस सुनसरीका सभापति केदार भण्डारीले दीप प्रज्वलन कार्यक्रमलाई सम्वोधन गर्दै नेता भट्टराईले आश, लोभ र लालच नगरेर सिंगो कांग्रेसलाई बलियो बनाउने काममा लागि परेको बताए । देशको जनतालाई रैतीबाट नागरिक बनाउन आन्दोलनमा सक्रिय रुपमा भुमिका निर्वाह गरेको उनले बताए । नेता भट्टराईले देश, जनता र प्रजातन्त्र बाहेक केही नसोचेको उनले बताउँदै आन्दोलनको क्रममा कारागारमा जीवन बिताएर प्रजातन्त्रको विरुद्ध कुनै सम्झौता नगरिएको बताए ।
नेपाली कांग्रेसको हकहितमा र प्रजातन्त्रको लागि धेरै संघर्ष गरेका नेता भट्टराईले गरेका काम र योगदानलाई युवाहरुले अनुसरण गर्नुपर्ने सभापति भण्डारीको कथन छ । स्थानीय तह, प्रदेश र संघीयको चुनाव हुन लागेको अवस्थामा नेपाली कांग्रेस एक जुट भएर लाग्नुपर्ने उनले बताउँदै कम्युनिष्टहरुले देशलाई जजर अवस्थामा पुगाएको उनको भनाई छ । स्थानीय तहदेदी प्रतिनिधि सभाको निर्वाचनको तयारीमा नेपाली कांग्रेसका नेता तथा कार्यकर्ताहरुलाई होमिन समेत उनले अनुरोध गरे । सुनसरी कांग्रेसका सभापति भण्डारीले पार्टीको लक्ष्यलाई पुरा गर्नका निमित नेता भट्टराईलाई सम्झिदै आजदेखी युद्धमा होमिनका लागि सबैलाई आग्रह गरे ।
त्यसैगरी नेपाली कांग्रेस सुनसरीका उपसभापति पंकज महतोले नेपाली कांग्रेसको १४ औं महाधिवेशन सम्पन्न भएकोले सुनसरी कांग्रेस एक्सनमा आउने बताए । कांग्रेसको एक पटकको रिल सकिएको उनले बताउँदै अबको स्थानिय तहदेखी केन्द्रसम्मको चुनावमा सुनसरी कांग्रेस एक्सनमा आएर कामलाई अगाडी बढाउने बताए । एक्सनमा आएर सुनसरी जिल्लामा कांग्रेसलाई लालकिलाबाट सुपर किला बनाउन सबैलाई उनले अनुरोध गरे ।
