हरिनगर । नेपाल रेडक्रस सोसाइटी हरिनगर उपशाखा कार्यालय सुनसरीको १८ औं वार्षिक साधारण सभा सम्पन्न भएको हो । सुनसरीको हरिनगर माध्यमिक विद्यालय हरिनगराको प्राङ्गणमा नेपाल रेडक्रस सोसाइटी हरिनगर उपशाखाको १८ औं वार्षिक साधारण सभा सम्पन्न भएको हो ।
साधारण सभाका प्रमुख अतिथि हरिनगर गाउँपालिकाका अध्यक्ष गफार अन्सारीले हरिनगर रेडक्रस सोसाइटीमा राजनीतिकरण नगर्न अनुरोध गरेका छन् । नेपाल रेडक्रस सोसाइटी उपशाखा हरिनगरले विपदको बेला उद्धार तथा राहतको व्यवस्था गर्ने भएकाले सहमति र सहकार्यमा काम गरेको उनले बताए ।
उनले भने, ‘निस्वार्थ भावनाले काम गर्ने समाजिक संस्था हो । नेपाल सरकारसँग साझेदारी गरेर रेडक्रसले काम गर्दै आएको छ । सामाजिक परोपकारी संस्था भएकाले विपदको बेला सेवा गर्दै आएको रेडक्रसले हरिनगरका जनतालाई समस्यामा सहयोग गर्ने गरेको छ ।’
नेपाल रेडक्रस सोसाइटी सुनसरी जिल्लाका कोषाध्यक्ष बिष्णुदेव मण्डलले वार्षिक साधारण सभाको सफलताको शुभकामाना व्यक्त गर्दै रक्तदान गर्न सबैलाई आग्रह गरेका थिए । मुलुकमा रगतको अभावका कारण सर्वसाधारणहरुको अकालमैय मृत्यु हुनबाट जोगिनका लागि यस क्षेत्रका सर्वसाधारणहरुले रक्तदान गर्न आवश्यक रहेको बताए ।
मण्डलले हरिनगर गाउँपालिकाले मोरङ्गका रेडक्रससँग वार्षिक सम्झौता गरेर रगत निःशुल्क उपलब्ध गराउन पहल गर्नुपर्ने सुझाएका थिए । यस क्षेत्रका जनता बिराटनगरका अस्पतालहरुमा उपचार गराउन गएको बेला रगत अभावका कारण समस्यामा पर्ने बिरामीहरुलाई सहजताका लागि सम्झौता गरि निःशुल्क रगत उपलब्ध गराई सेवा सुविधाहरु दिनुपर्नेमा उनले जोड दिएका थिए ।
नेपाल रेडक्रस सोसाइटी हरिनगरका उपाध्यक्ष देव नारायण मेहताले स्वागत मन्तब्य व्यक्त गर्दै आगामी कार्यकालमा नेतृत्वमा नआउने घोषणा गरेका थिए । आफु रेडक्रसमा रहेर जनताको सेवामा समर्पित रहेर कामकाज गर्दै आएकोले आगामी फागुन वा चैत महिनामा हुने अधिवेशनमा कुनै पनि पदमा नेतृत्व नलिने मेहताले घोषणा गरेका हुन् ।
नेपाल रेडक्रस सोसाइटी उपशाखा हरिनगरका सचिव हिरालाल पालले वार्षिक प्रगति प्रतिवेदन र आर्थिक प्रतिवेदन प्रस्तुत गरेका थिए । वार्षिक प्रतिवेदनमा २०७७÷०७८ मा ३ तीन लाख ४८ हजार २ सय ६८ रुपैयाँ १० पैसाको आय व्यय उनले प्रस्तुत गरेका थिए ।
हरिनगर रेडक्रसका सभापति कृष्ण प्रसाद देवको अध्यक्षतामा कार्यक्रम सम्पन्न भएको थियो ।
हरिनगर गाउँपालिकाकी उपाध्यक्ष रिमझिम कुमारी भगत, कांग्रेसका नेता शिवहरी श्रेष्ठ, हरिनगर माविका प्रअ बलराम मण्डल, युवा नेता दाउद अन्सारी, नेकपा माओवादी सुनसरी सदस्य भगवती महतो, समाजसेवी दिनेश भगत लगायतकाले साधारण सभाको सफलताको शुभकामना व्यक्त गरेका थिए । कार्यक्रम राजेश पालले संचालन गरेको थियो ।
