भोक्राहा । सुनसरीको भोक्राहा नरसिंह गाउँपालिकामा एक दिने सेवा प्रवाह सम्वन्धी अभिमुखीकरण कार्यक्रम सम्पन्न भएको छ । भोक्राहा नरसिंह गाउँपालिकाको सभाहलमा बिहीवार एक दिने सेवा प्रवाह सम्वन्धी अभिमुखीकरण कार्यक्रम सम्पन्न भएको हो ।
भोक्राहा नरसिंह गाउँपालिकाका अध्यक्ष महेन्द्र प्रसाद यादवले पालिकाबाट जनतालाई समयमै सेवा प्रवाह गर्नुपर्नेमा जोड दिएका थिए । अध्यक्ष यादवले किसानहरुलाई राहत उपलब्ध गराउन, कोभिड–१९ माहामारीले पीडित भएका व्यक्ति÷परिवारले नगद अनुदान दिन, सामाजिक सुरक्षा भत्ता समयमै वितरण गर्न तथा योजना तथा कार्यक्रमहरुलाई कार्यान्वयन गर्न ढिलाई सुस्ती नगरी जनमुखी सेवा प्रवाह गर्न कर्मचारीहरुलाई अनुरोध गरेका थिए ।
त्यसैगरी भोक्राहा नरसिंह गाउँपालिकाकी उपाध्यक्ष पुनम कुमारी मेहताले पालिकाका कर्मचारीहरु इमान्दार, लगनशिल, सेवामुखी र अनुशासित भएर जनताको कामप्रति वफादार भएर काम गर्नुपर्ने बताएकी छिन् ।
भोक्राहा नरसिंहका प्रमुख प्रशासकीय अधिकृत बाबुनन्दन मेहताले सेवा प्रवाह सम्वन्धी अभिमुखीकरण कार्यक्रममा कार्यपत्र प्रस्तुत गरेका थिए । प्रमुख प्रशासकीय अधिकृत मेहताले सेवाग्राहीहरुलाई पालिकाका कर्मचारीहरुले दुःख नदिई छिटो छरितो सरल तरिकाबाट कार्यालयबाट सेवा प्रवाह गर्न कर्मचारीहरुलाई अनुरोध गरेका थिए ।
मेहताले प्रशासनिक काममा कुनै समस्या वा अप्ठयारो परेको खण्डमा आफुले सहयोग गर्न तयार रहेको बताए । कार्यालयमा कुनै किसिमको समस्या भए आफुलाई तुरुन्त जानकारी गराउन अनुरोध गर्दै उनले कर्मचारीहरुले मनोमानी ढङ्गबाट काम गर्न नहुने र कार्यालय समयभित्र जनताको काम गर्न तम्तयार रहनुपर्नेमा जोड दिए ।
कार्यक्रममा दर्ता, चलानी, अभिलेख व्यवस्थापन, भर्पाइ, सर्जमिन मुचुल्का, अनुगमन निरीक्षण, प्रतिवेदन, आर्थिक अख्तियारी, राजस्व संकलन, खर्च, भूक्तानी, जिम्मेवारी र उत्तरदायित्व लगायतको विषयमा सहजिकरण गरिएको थियो ।
