टोमराज मेहता
हरिनगर । सुनसरीको हरिनगर गाउँपालिकामा दोश्रो कार्यकालको लागि अध्यक्ष र उपाध्यक्ष पदमा नेपाली कांग्रेस बिजयी भएको छ । नेपाली कांग्रेसको तर्फबाट अध्यक्ष पदमा गफार अन्सारी र उपाध्यक्ष पदमा रिमझिम कुमारी भगत दोश्रो कार्यकालको लागि बिजयी भएका हुन् ।
हरिनगर गाउँपालिकाको अध्यक्ष पदमा गफार अन्सारीले ६ हजार १ सय ७२ मत र उपाध्यक्ष पदमा रिमझिम कुमारी भगतले ६ हजार २ सय १३ मत प्राप्त गरी बिजयी भएको निर्वाचन अधिकृतको कार्यालय हरिनगरले जनाएको छ ।
अध्यक्ष पदमा बिजयी भएका गफार अन्सारीको प्रतिद्वन्द्वी नेकपा एमालेको तर्फबाट हरिनगर गाउँपालिकाको अध्यक्ष पदका उम्मेदवार लस्करी अन्सारीले ५ हजार १ सय ५४ मत प्राप्त गरी पराजित भएका छन् । अध्यक्ष अन्सारीले उनलाई १ हजार १८ मतले पछि पार्दै बिजयी भएका हुन् ।
त्यसैगरी हरिनगर गाउँपालिकाको उपाध्यक्ष पदमा बिजयी भएकी रिमझिम कुमारी भगतको प्रतिद्वन्द्वी नेकपा एमालेकी कोशिला कुमारी साहुलाई ८ सय ६ मतले पछि पार्दै उनी बिजयी भएकी हुन् ।
संविधान जारी भएको पहिलो पटक २०७४ सालमा भएको स्थानीय तहको निर्वाचनमा हरिनगर गाउँपालिकाको अध्यक्ष पदमा नेपाली कांग्रेसका उम्मेदवार गफार अन्सारीले नेकपा एमालेका उम्मेदवार लस्करी अन्सारीलाई पराजित गर्दै बिजयी भएका थिए । दोश्रो पटक भएको २०७९ को निर्वाचनमा समेत हरिनगर गाउँपालिकाको अध्यक्ष पदमा नेकपा एमालेका उम्मेदवार अन्सारीलाई पराजित गर्दै कांग्रेसका उम्मेदवार अन्सारीले भारी मतान्तरले बिजयी भएका छन् ।
दोश्रो कार्यकालका लागि जनताले दिएको जिम्मेवारीलाई इमान्दारिताका साथ निर्वाह गर्ने र हरिनगर गाउँपालिकामा अधुरा रहेका कामलाई पूरा गर्ने नवनिर्वाचित अन्सारीले प्रतिवद्धता व्यक्त गरेका छन् । जनताको आशा र भरोसालाई कायम गर्दै पुनः अध्यक्ष पदमा भारी मतले बिजयी गराउने मतदाताहरुलाई धन्यवाद ज्ञापन गरेका छन् ।
