इनरुवा । सुनसरीको भोक्राहा नरसिंह गाउँपालिकामा नेपाल रेडक्रस सोसाइटी जिल्ला शाखा सुनसरीको आयोजना र युनिसेफको सहयोगमा गाउँपालिका स्तरीय समन्वय तथा समीक्षा बैठक सम्पन्न भएको छ ।
कोभिड १९ को पूर्व तयारी तथा प्रतिकार्य कार्यक्रम २०२० अन्तरगत पालिका स्तरीय समन्वय तथा समीक्षा बैठक बुधवार बिभिन्न सरोकारवालाहरुसँग सम्पन्न भएको हो ।
कोभिड १९ को पूर्व तयारी तथा प्रतिकार्य कार्यक्रम सुनसरीको हरिनगर र भोक्राहा नरसिंह गाउँपालिकामा सञ्चालन गरेको कार्यक्रमको समीक्षा गरेको जिल्लावास सुपरभाईजर सन्तोष कुमार शर्माले जानकारी दिएको हो ।
सो पालिकामा साउन २ गतेदेखी कोभिड १९ को पूर्व तयारी सम्वन्धि बिभिन्न सचेतनामूलक कार्यक्रम गर्दै आएको हुदाँ कार्यक्रम के कस्तो भयो ?, समुदायमा कतिको प्रभावकारी भयो ? कार्यक्रमको बारेमा सरोकारवालाहरुको जिज्ञासा लिनका लागि समिक्षा बैठकको आयोजना गरिएको सुपरभाइजर शर्माले बताए ।
नेपाल रेडक्रस सोसाइटी जिल्ला शाखा सुनसरीका उपकोषाध्यक्ष बिष्णुदेव मण्डलले कोरोना भाइरस कोभिड १९ को जोखिममा पनि रेडक्रस सुनसरी र युनिसेफको सहकार्यमा कोभिड १९ पूर्व तयारी कार्यक्रम पालिकाहरुमा पहिलो चरणको समीक्षा गर्न सरोकारवालाहरुसँग बैठक तथा छलफलको आयोजना गरेको बताए ।
पछाडि पारिएको पालिकाहरुलाई छनौट गरी विद्यालयहरुमा कार्यक्रम सञ्चालन गरेको हुदाँ यसको मूल्याङ्गन गर्नका लागि समिक्षा बैठकको आवश्यकता परेकोले सरोकारवालाहरुको राय संकलनका लागि बैठक आवश्यक भएको उपकोषाध्यक्ष मण्डलले बताए ।
दोश्रो चरणका लागि भोक्राहा नरसिंहमा थप विद्यालयहरुमा कार्यक्रम गर्ने लक्ष्य रहेको मण्डलले बताउँदै बिद्यालयहरुमा भौतिक पूर्वाधारका कामहरु गर्ने समेत उनले बताए ।
नेपाल रेडक्रस सोसाइटी १ नम्बर प्रदेशका कार्यक्रम अधिकृत सुनरमन महतोले साउन २ देखी हालसम्मको गतिविधिहरुको बारेमा सहजीकरण गर्दै प्रकाश पारेको थियो ।
६ महिनाको अवधिमा भोक्राहा नरसिंह गाउँपालिकामा पहिलो चरणमा पालिकासँग सम्झौत्ता, कर्मचारी ब्यवस्थापन, कार्यक्रम अभिमूखिकरण गोष्ठि, वडा स्तरीय गोष्ठि, कार्यदल गठन र तालिम, विद्यालय छनौट, प्राविधिक इस्टीमेट डिजाइन, वास गतिविधि, जनचेतनामूलक कार्यक्रम, अनुगमन, समन्वय, सर्वेक्षण लगायतको कामहरु गरेको १ नम्बर प्रदेशका कार्यक्रम अधिकृत महतोले जानकारी दिएका थिए ।
नेपाल रेडक्रस सोसाइटी उपशाखा भोक्राहा नरसिंहका सभापति युवराज दाहालले पालिकामा कार्यक्रम प्रभावकारी बनाउन आफूहरु लागि परेको बताए । समुदायमा कोभिड १९ को बारेमा जनचेतना फैलाएको र विद्यालयहरुमा भौतिक पूर्वाधारको कामहरु गरेको हुदाँ पहिलो चरणको समीक्षाले काम गर्न थप उत्प्रेरणा जगाएको सभापति दाहालले बताए ।
आफूले कसैलाई भेदभाव नगरीकन आफनो वडा भन्दा फरक वडामा चाहिएको विद्यालयमा काम गर्न सहयोग गरेको उनले बताए । सभापति दाहालले अगामि दिनमा समन्वय सहकार्य गरी थप प्रभावकारी बनाउन आफनो भूमिका रहने समेत प्रतिवद्धता ब्यक्त गरेका छन् ।
समीक्षा बैठकबाट आएको सल्लाह सुझावलाई मध्यनजर दोश्रो चरणको कार्यक्रम पनि आउने बिश्वास समेत उनले ब्यक्त गरें । कार्यक्रममा २० जना भन्दा बढीको सरोकारवालाहरुको सहभागिता रहेको थियो ।
