इनरुवा । सुनसरीको इनरुवामा एक वर्षअघि गठन भएको सिर्जनामा इनरुवा साहित्यिक कार्यक्रमको आठौ श्रृखला सम्पन्न भएको छ । गीत, गजल, कविता र लघु नाटकसहित आठौ श्रृंखला इनरुवा–२को सत्य संसार साप्ताहिक पत्रिकाको समन्वय तथा संयोजनमा सम्पन्न भएको हो ।
कार्यक्रममा इनरुवा नगर क्षेत्रसहित इटहरी उपमहानगरपालिकाका साहित्यकार तथा कलाकारहरुको उपस्थिति रहेको थियो । कार्यक्रममा कलाकार तथा पत्रकार पवन रौनियारले बालविवाहविरुद्धको नाटक प्रस्तुत गरेका थिए भने साहित्कार खखेराले मुक्तक प्रस्तुत गरेका थिए ।
साहित्यमा रुचि राख्ने ३० बढी सरोकारवालाहरुको सहभागितामा सम्पन्न भएको कार्यक्रममा साहित्यकार पुरुषोत्तम घिमिरे, कालीदास कोइराला, फडिन्द्रप्रसाद दाहाल, काव्यकार डम्भरुबल्लभ भण्डारी, यशोधा अधिकारी, जेनिस देव, कान्ता पोखरेल भट्टराई, टिका सिवाकोटी आचार्य, बिनिता दाहाल, चन्दन गुप्ता, छविनाथ रिजाल, गोपाल कोइराला त्यागी, प्रकाश मेहता अनुराग, विष्णु न्यौपाने, रमेन्द्रमुनि कोइराला, विष्णुुथापा मगरलगायतले रचना वाचन गरेका थिए ।
त्यसैगरी कार्यक्रममा नेपाल पत्रकार महासंघ प्रदेश १ का सदस्य जयकृष्ण यादव, जिल्ला सदस्य टोमराज मेहता, चन्दन गुप्ता, पत्रकार दिपेन्द्र यादव, अजमल हुसैन, असलम साफी, सत्य संसार साप्ताहिकका अरविन्द यादव, सुरज यादव, शिक्षक देवकृष्ण यादवलगायत सरोकारवालाको समेत उपस्थिति रहेको थियो ।
सिर्जनामा इनरुवाको आठौं श्रृंखला लिलानाथ सिलवालको अध्यक्षता र प्राज्ञ जीवनाथ पोखरेल पक्षीको प्रमुख आथित्यमा सम्पन्न भएको थियो । कार्यक्रममा देशको समसामयिक अवस्थादेखि माया प्रीतिसम्मका कुराले भरिएका कथा, कविता, गजल र मुक्तकहरु प्रस्तुत गरिएको थियो ।
कार्यक्रममा गायक प्रकाश अनुरागको मैथिली गीत ‘गै गोरी तोरा गालमे रङ लगावै दे’ गाएपछि कार्यक्रम हल नै गुञ्जयमान बनेको थियो । त्यस्तै पत्रकार तथा साहित्यकार पवन रौनियारको ‘एउटै व्यक्ति तीन पात्र’को अभिनयमा सबै चकित हुँदै गडगडाहट तालिले साथ दिएका थिए ।
कवि तथा शिक्षक लिलानाथ सिलवालको ‘माया ल्याउने भन्थी’ गजलमा ८२ वर्षका साहित्यकार छविनाथ रिजालदेखि १४ वर्षका स्रोता सुरज यादवसम्म ताली बजाएर पेट मिचीमिची हाँसेका थिए । साहित्यकार तथा शिक्षक रमेन्द्रमुनि कोइरालाको ‘छोडी जानेलाई’ गजल प्रस्तुुत गरेपछि सहभागीहरुले तालीबाट स्वागत गरेका थिए ।
