संगम विष्ट
चतरा । चतरामा जारी प्रथम बराह च्यालेन्ज फुटबल प्रतियोगिता अन्तर्गत आइतबार भएको खेलमा पटनाली फुटबल क्लब धरान विजयी भएको छ। सङ्गम फुटबल क्लब तित्रिगाछिलाई ट्राइवेकरमा १ का विरुद्ध ४ गोलले हराउँदै पटनाली विजेता बनेको हो।
अत्यन्त रोचक एवम् प्रतिस्पर्धात्मक खेलको निर्धारित समय र थप अतिरिक्त समयमा दुवै टिमबाट २–२ गोलको बराबरी भए पछि खेलको नतिजा ट्राइवेकरबाट लिएको थियो ।
पहिलो हाफको ५ औँ मिनेटमा पटनालिले खेलमा अग्रता लिएको थियो। पटनालीकालागि टिम क्याप्टेन सुदेश राईले गोल गरेका थिए । १ गोलले पछि परेको सङ्गम फुटबल क्लब उपहार गोल मार्फत पहिलो हाफमै खेलमा फर्किएको थियो । पहिलो हाफको २३ औँ मिनेटमा सङ्गम फुटबल क्लबका खेलाडी रोनि विष्टको कर्नर बललाई क्लियर गर्ने हुँदा आफ्नै पोष्टमा पटनालीका सुजन बस्नेतले आत्मघाती गोल गर्न पुगेका थिए ।
पहिलो हाफमा १–१ को बराबरीमा टुङ्गिएको खेलको दोस्रो हाफको २० औँ मिनेटमा सङ्गम फुटबल क्लबले गोल गर्दै पटनालि विरुद्ध अग्रता लिएको थियो । सङ्गम फुटबल क्लवकालागि रोनि बिष्टले गोल गरेका थिए । १ गोलले पछि परेको पटनालीले दोस्रो हाफको २३ औँ मिनेटमा खेलमा बराबरीमा गोल गरेको थियो । पटनालीकालागि जर्सी नं १४ का नगेन्द्र कार्कीले गोल गरेका थिए । त्यसपछि निर्धारित र अतिरिक्त समयमा थप गोल हुन नसक्दा खेलको नतिजाकालागी ट्राइवेकरको सहारा लिइएको थियो ।
ट्राइवेकरमा २ पेनाल्टी सुटलाई विफल बनाएका पटनालिका गोल रक्षक सुमन निरौला म्यान अफ द म्याच घोषित भए। उनलाई माउन्ट एभरेस्ट रिपोर्टिङ क्लबका अध्यक्ष सूर्य तुम्बाहाम्फेले नगद २ हजार र ट्रफी प्रदान गरे । खेल स्थानीय बाइसबिघे खेल मैदानमा भइरहेको छ ।
