सुनसरी । कोरोना संक्रमणको दोस्रो लहर बढेसँग मुलुकभर अक्सिजनको हाहाकार छ । राजधानी काठमाडौंदेखि देशका थुप्रै ठाउँका अस्पतालहरु अहिले अक्सिजनको चरम अभाव खेपिरहेका छन् । समयमै अक्सिजन नपाउँदा कैयौं कोरोना संक्रमितले ज्यान पनि गुमाउनु परेको छ ।
देशैभरको यो मागलाई केही हदसम्म पूरा गर्न प्रदेश नम्बर १ का अक्सिजन प्लान्टहरु लागिपरेका छन् । विशेषगरी यो प्रदेशको सुनसरी र मोरङमा रहेका अक्सिजन प्लान्टहरुले अक्सिजन उत्पादन र सिलिन्डर भर्दै देशभर पुर्याइरहेका हुन् ।
देशैभरबाट आउने मागलाई व्यवस्थापन गर्न र अक्सिजनको दुरुपयोग हुन नदिन यतिबेला प्रहरी प्रशासन पनि उत्तिकै रुपमा खटेका छन् ।
प्रदेशको सुनसरीमा ३ वटा अक्सिजन प्लान्ट छन्, जहाँ अहिले देशैभरिबाट अक्सिजनको माग आउने गरेको छ । त्यसकारण अक्सिजनको ‘मिसयुज’ नहोस् भन्नका लागि र व्यवस्थापनका लागि दिनरात नै खटिरहेको जिल्ला प्रहरी कार्यालय सुनसरीका प्रहरी प्रमुख एसपी कमल थापाले पर्दाफासलाई बताए ।
‘जिल्ला प्रहरी कार्यालयबाट प्रहरी निरीक्षकको नेतृत्वमा दुई जनालाई उद्योगसँग समन्वय गर्न खटाएका छौं । जिल्लामा ३००० हजार सिलिन्डर छन् । झापा, धनुषा, सिरहा, सप्तरी, पूर्वका पहाडीमा जिल्लामा डिलरमार्फत आपूर्ति भइरहेको छ । एक हजार भन्दा बढी सिलिन्डर पनि संकलन गरेका छौं,’ उनले भने ।
यस्तै, स्वास्थ्य मन्त्रालयसँग समन्वय गरेर संखुवासभा, ताप्लेजुङ, पाँचथरमा रहेका हाइड्रोपावरमा रहेका सिलिन्डर अहिले काठमाडौंदेखि स्थानीय अस्पतालमा प्रयोग गर्नका लागि पठाएको उनले जानकारी दिए ।
‘काठमाडौं लगायत स्थानबाट सीडीओ कार्यालय हुँदै अक्सिजन माग हुने गरेको छ । त्यसअनुसार प्रहरीले उद्योगसँग समन्वय गरेर सिलिन्डर भरी विमानस्थल पुर्याउने र उताबाट खाली सिलिन्डर उद्योगसम्म लैजाने भूमिका निर्वाह गर्दै आएको छ,’ एसपी थापाले भने ।
उनका अनुसार जिल्लाका प्लान्टसँग समग्रमा ३००० भन्दा बढी सिलिन्डरमा अक्सिजन भर्न सकिने क्षमता छ । ‘ती अक्सिजन देशैभर नै वितरण गरिरहेका छौं । यदि कुनै स्थानमा आवश्यकता छ भने पनि यहाँ सिलिन्डर ल्याउनु भएमा हामी अक्सिजनका भरेर पठाउन सक्षम छौं भन्ने जानकारी गराउन चाहन्छु,’ उनले भने ।
मोरङमा २ वटा अक्सिजन प्लान्ट चालू अवस्थामा छन् । अर्को एउटा पनि मर्मतसम्भार गरेर चल्ने क्रममा छ । जिल्लाका प्रहरी प्रमुख एसपी सन्तोष खड्काले मोरङका अस्पताल, कोभिड अस्पताल तथा आइसोलेसनलगायतमा अक्सिजनको अभाव नभएको पर्दाफासलाई बताए । ‘यस्तै, धनगढी, काठमाडौं, भैरहवा, भक्तपुर लगायत स्थानबाट अभाव भएका कारण हामीलाई अक्सिजनका लागि अनुरोध गर्नुभएको छ । हामीले उद्योगहरुसँग समन्वय गरेर पठाइरहेका छौं,’ उनले भने ।
साथै, प्रहरीले विभिन्न उद्योग तथा व्यवसायमा प्रयोग भएका अक्सिजन सिलिन्डर पनि संकलन पनि गरिरहेको छ । ‘हालसम्म २०० वटा अक्सिजन सिलिन्डर संकलन भएको छ भने उद्योगमा चालू अवस्थामा रहेका सिलिन्डरको पनि अभिलेख राखेका छौं । देशैभरबाट माग भएअनुसार अक्सिजन भरेर पठाउनका लागि उद्योगसँग समन्वय गरेका छौं,’ एसपी खड्काले भने ।
प्रदेश १ का प्रहरी प्रमुख डीआईजी ईश्वरबाबु कार्कीले प्रदेशमा अक्सिजन उत्पादन अन्य प्रदेशभन्दा बढी भएकाले त्यसलाई वितरणमा प्रहरीले सहयोग गर्दै आएका बताए । ‘प्रदेश १ मा अक्सिजनको कमी हुन नदिन त्यसको व्यवस्थापन र वितरणमा सहयोग गर्दै आएका छौं, त्यसबाहेक काठमाडौंलगायत देशैभरबाट आएका अक्सिजन माग आउँदै प्रहरीले समन्वयकारी भूमिका निर्वाह गरिरहेको छ ।’ श्राेत: पर्दाफास डट कम्
