‘हम बाजब
बाज लेल बाजब
ओ किछु कहै
हमर अधिकार
हम लेबे करब ।’
(म बोल्छु / बोल्नका लागि बोल्छु / उसले जेसुकै भनोस् / मेरो अधिकार / म जसरी पनि लिन्छु ।)
यस्तै–यस्तै ताङ्का भनिने पाँच हरफे शैलीका एक सय १२ वटा छोटा कविताहरूको सङ्ग्रह ‘व्योमक ओहि पार’ (आकाश उतापट्टि) आज काठमाडौँमा सार्वजनिक गरिएको छ । मैथिली भाषाको ताङ्कासङ्ग्रह ‘व्योमक ओहि पार’का रचनाकार मैथिली कवि तथा साहित्यकार धर्मेन्द्र विह्वल हुन् ।
मैथिली तथा नेपाली भाषामा विभिन्न कृति लेखिसकेका साहित्यकार विह्वल नेपाली पत्रकारितामा धर्मेन्द्र झाका नामले परिचित छन् । मैथिली भाषाको पहिलो ताङ्कासङ्ग्रह ‘व्योमक ओहि पार’ नेपालवाणी मिडिया ग्रुपले प्रकाशन गरेको हो ।
नेपाल पत्रकार महासङ्घका पूर्वअध्यक्ष तथा कोसी अनलाइनका प्रधानसम्पादकसमेत रहेका धर्मेन्द्र विह्वल (झा)को नवनीतम् कृति ‘व्योमक ओहि पार’ महासङ्घका अध्यक्ष विपुल पोखरेल, अग्रज पत्रकारद्वय तारानाथ दाहाल र बबिता बस्नेत, साहित्यकार विजेता चौधरी, प्रकाशक दामोदर दवाडीले संयुक्त रूपमा सार्वजनिक गरेका थिए ।
फरक–फरक विधामा लेख्न रुचाउने साहित्यकार विह्वलद्वारा रचित मैथिलीमा रास्ता तकैत जिनगी (कवितासङ्ग्रह), एक सृष्टि एक कविता (दीर्घ कविता), एक समयक बात (हाइकुसङ्ग्रह) तथा धुवाँएल आकृतिसभ (छौक सङ्ग्रह) प्रकाशित भइसकेका छन् ।
यसैगरी, गोनु झाका कथाहरू, कौशलका परिहास, भ्रमरका उत्कृष्ट नाटकहरू, नेपाली मिथक कोष, नेपालीय मैथिली छापा पत्रकारिताको इतिहासलगायत नेपाली भाषाका कृतिहरू धर्मेन्द्र विह्वलका रचना हुन् ।
कोशी अनलाइनको सहयोगमा
