इनरुवा । नेकपा एमालेकी नेतृ सुनसरी इन्चार्ज भगवती चौधरीले कोरोना संक्रमणको दोश्रो भेरियन्ट शक्तिशाली भएको बताउँदै आम जनसमुदायलाई सावधानी अपनाउँदै सुरक्षित रहन आग्रह गरेकी छन् ।
कोभिड–१९ को दोश्रो भेरियन्टले छिमेकी मुलुकसँगै हाम्रो देशपनि आक्रान्त भइरहेको र पछिल्लो एक सातायता मुलुकमा कोरोना संक्रमणको बृद्धिदर २ सय प्रतिशत माथि गइरहेको प्रति जनसमुदायलाई सचेत गराउँदै कोरोना संक्रमणबाट जोगिने एक मात्र उपाय भनेको सामाजिक दुरी रहेको बताएकी छन् ।
‘हिजो मात्रै एकै दिन ५५ जनाको कोरोना संक्रमणबाट मृत्यु भएको पुष्टि भएको छ । दैनिक ७ हजारभन्दा माथिमा संक्रमण फैलिइरहेकोले हामीले सावधानी अपनाउनुको विकल्प छैन ।’ पूर्वराज्यमन्त्री समेत रहेकी चौधरीले भनेकी छन् ।
नेतृ चौधरीले कोरोना संक्रमणको पहिलो भेरियन्ट लामो समय सामाजिक दुरी कायम गर्दै, लकडाउन गर्दै विताएको स्मरण गर्दै आर्थिक रुपले लकडाउनले मुलुकको अर्थतन्त्रलाई धरासायी बनाएपनि लकडाउन र सामाजिक दुरीले नै कोरोना संक्रमणबाट कसरी बच्न सकिँदो रहेछ भन्ने सिकाएको बताएकी छन् ।
‘लकडाउनले मुलुक र हाम्रो अर्थतन्त्रलाई धरासायी बनायो होला तर, त्यो लकडाउन र सामाजिक दुरीले नै कोरोना संक्रमणबाट कसरी बच्न सकिँदो रहेछ ? कसरी कोरोना संक्रमणको चेनलाई ब्रेक डाउन गर्न सकिँदोरहेछ थाहा पायौं । र, अहिलेको दोश्रो भेरियन्टबाट बच्न पनि सामाजिक दुरी र स्वास्थ्य सुरक्षाको विकल्प देखिएको छैन ।’ चौधरीको भनाई छ ।
कोरोना भाइरसको खोप तयार भएपनि त्यसको प्रभावकारीता अझै परीक्षणकालमा रहेको समेत तर्क गर्दै नेतृ चौधरीले खोप लगाएकाहरुमा पुुनः कोरोना संक्रमण देखिएको र मृत्युसमेत भएको पाइएकोले कोरोना भाइरसलाई मजाकको रुपमा, ख्याल ठट्टाको रुपमा नलिन आग्रह गरेकी छन् ।
जथाभावी हिँडडुल गर्ने, चौकचौकमा भेला भएर गफ हाँक्ने, मास्क नलगाउने, सामाजिक दुरी कायम नगर्दा नै आज कोरोना भाइरस समुदाय स्तरमा फैलिएको उनको बुझाई छ । ‘कोरोना भाइरस संक्रमणको चेनब्रेक गर्नका लागि पनि सामाजिक दुरी अपरिहार्य छ । यो बेला घरभित्रै बसेर नियमित साबुन पानीले हात धुने, सेटिाइजर गर्ने, परिवारसँग समय विताउने, आफ्नै घर खेत करेसाबारीमा रमाउने समय हो ।’
उनले विपत्तिको बेला राज्य जनताको अभिभावक बन्न सक्नुपर्ने भन्दै राज्यको ध्यानाकर्षण पनि गराएकी छन् । अहिले राज्यको सबै श्रोत साधन जनताको स्वास्थ्य सुरक्षामा लगाउनु परिरहेको उल्लेख गर्दै चौधरीले कतिपय विकास निर्माण र परियोजनाका बजेटहरु कटाएर स्वास्थ्योपचारमा खर्च गरिएको भएपनि राज्यको ध्यान सबै तहमा पुग्न नसकेको जिकिर गरेकी छन् ।
‘कोरोना संक्रमतिको उपचार गर्न अस्पतालहरुमा अक्सिजन, भेन्टिलेटर र आइसियूको अभाव छ । दिनदिनै स्वास्थ्यकर्मी समेत मृत्युको मुखमा पुगिरहेका छन् । स्वास्थ्यकर्मीको समुचित व्यवस्थापन र सुरक्षाका लागि राज्यले विशेष ध्यान दिनुपर्छ ।’ चौधरीको भनाई छ ।
राज्यका तीनै तह, स्थानीय, प्रदेश र केन्द्रले आफ्ना सबै शक्ति कोरोना संक्रमण नियन्त्रण, रोकथाम र उपचारमा केन्द्रीत गर्नुपर्नेमा स्थानीय र प्रदेश सरकारको भूमिका कमजोर भएको पनि बताएकी छन् । ‘जबसम्म स्थानीय सरकार स्थानीय जनताको स्वास्थ्य सुरक्षाप्र्रति उत्तरदायी हुँदैनन् तवसम्म महामारी नियन्त्रणमा आउन सक्दैन । पहिलो भेरियन्टमा स्थानीय, प्रदेश सरकारले जसरी गम्भिरताका साथ काम गरेका थिए, दोश्रो भेरियन्टमा देखिएन ।’ चौधरीले भनेकी छन् ।
आजको दिनसम्म आइपुग्दा कुनैपनि स्थानीय निकायले अब कसरी काम गर्ने योजना नै नबनाएको दाबी गर्दै चौधरीले विपत्तिको बेलामा जनप्रतिनिधिहरु जनताप्रति उत्तरदायी नहुनु भनेको जनमतको अवमुल्यन गरेको तर्क गरेकी छन् । ‘जनतालाई सत्ता प्राप्तिको भर्याङ मात्र बनाइनु हुन्न ।’
उनले नेपालको खुल्लाा सिमानाका कारणपनि कोरोना संक्रमण दर बढेको औंल्याएकी छन् । नेपालमा देखिएको कोरोना भाइरसको भेरियन्ट मध्ये भारतीय भेरियन्ट बढी शक्तिशाली देखिएको बताउँदै नेपाल–भारतविचको खुल्ला सिमाका कारण कोरोना संक्रमण नियन्त्रण बाहिर गइरहेको बताएकी छन् ।
‘अब केन्द्र सरकारले भारतसँग जोडिएका सबै प्रकारका खुल्ला सिमानाहरु बन्द गर्नुपर्छ । सिमा क्षेत्रमा आएर बसेका नेपालीहरुलाई पनि त्यहि स्थानहरुमा कोरोना स्वास्थ्य परीक्षण गरी, १४ दिनसम्म क्वारेन्टाइन, आइसोलेसनमा बस्ने व्यवस्था गर्नुपर्छ ।’ यसका लागिपनि स्थानीय निकायको भूमिका बढी जिम्मेवार हुनुपर्ने चौधरीको बुझाई छ । ‘राष्ट्रिय अन्तराष्ट्रिय हवाई मार्ग बन्द गरिएकाले त्यहाँबाट संक्रमण फैलन सक्ने अवस्था नरहेपछि खुल्ला सिमा नाका हाम्रोलागि ठूलो चूनौति हो ।’ चौधरीले भनेकी छन् ।
उनले नागरिक समाजलाई पनि कोरोना संक्रमण रोकथाममा लाग्न र सचेत रहन आग्रह गरेकी छन् । हाम्रो राज्य संरचना, आर्थिक अवस्था र राज्यको श्रोत साधन कुनैपनि विपत्ति नियन्त्रण र रोकथाम गर्न कमजोर भएको उल्लेख गर्दै उनले भनेकी छन्,‘राज्य किन कमजोर भयो पछि विश्लेषण गरौं तर, यो बेला जनताले पनि आफ्नो कर्तव्य पुरा गरौं ।’
अहिले जनताको मुख्य कर्तव्य भनेको सामाजिक दुरी कायम गर्नु रहेको बताउँदै चौधरीले घरभित्रै बसेर कोरोनालाई परास्त गर्न सकिन्छ भने लखरलखर आफ्नो र परिवारको जिउधन खतरामा पारेर घर बाहिर ननिस्कन आग्रह गरेकी छन् । ‘लकडाउनले व्यापार व्यवसाय चौपट भयो भन्दैमा निषेधाज्ञाको उलंघन नगरौं ।’
उनले लकडाउनको फाइदा उठाउँदै बजारमा दैनिक उपभोग्यका सामग्री कालोबजारी गर्नु राज्यविरुद्धको अपराध भएको तर्क गर्दै मान्छेको जिवन र मृत्युसँग जोडेर कमाएको धनसम्पत्तिको कुनै अर्थ नरहनेपनि बताएकी छन् ।
