टोमराज मेहता
इनरुवा । बैशाख ३० गते हुने स्थानीय तहको निर्वाचन मिति नजिकिदैँ जाँदा सुनसरीको पालिकाका उम्मेदवारहरुलाई चुनावी प्रचार प्रसार समाग्री वितरण गरेका छन् । नेपाली कांग्रेस केन्द्रीय युवा प्रचार नेटर्वक उपसमितिका केन्द्रीय सदस्य डाक्टर अबुल हुसेन अन्सारीले नेपाली कांग्रेसको तर्फबाट पालिकाकाउम्मेदवारहरुलाई चुनावी प्रचार प्रसार समाग्री वितरण गरेका हुन् ।
कांग्रेस सुनसरी क्षेत्र नम्बर–४ बाट महाअधिवेशन प्रतिनिधि समेत बनेका डा.हुसेन अन्सारीले सुनसरीको पालिकाहरुमा पुगी उम्मेदवारहरुलाई चुनावी प्रचार प्रसार समाग्री हस्तान्तरण गर्दै जितको अग्रिम बधाई तथा शुभकामना समेत व्यक्त गरेका छन् ।
स्थानीय तहको निर्वाचनमा प्रचार प्रसारका लागि डा.हुसेनले नेपाली कांग्रेसबाट टिकट पाएर उम्मेदवारी दर्ता गराएका पालिका प्रमुख र अध्यक्षहरुलाई भेटी सो समाग्री हस्तान्तरण गरेका हुन् ।
सुनसरीको हरिनगर गाउँपालिकाका लागि पुनः अध्यक्ष पदका लागि उम्मेदवार बनेका गफार अन्सारी, कोसी गाउँपालिकाका लागि पुनः अध्यक्ष पदका लागि उम्मेदवार बनेका ऐयुव अन्सारी, भोक्राहा नरसिंह गाउँपालिकाका अध्यक्ष पदका उम्मेदवार अजमल अख्तर आजाद , देवानगंज गाउँपालिकाका लागि अध्यक्ष पदका उम्मेदवार श्यामलाल मेहता, बर्जु गाउँपालिकाका अध्यक्ष पदका उम्मेदवार रघुनन्दन चौधरीलाई चुनावी प्रचार प्रसार समाग्री डा. हुसेन लगायतको टिमले हस्तान्तरण गरेका छन् ।
त्यसैगरी इनरुवा नगरपालिकाका नगर प्रमुखका उम्मेदवार केदार भण्डारी, दुहबी नगरपालिकाका लागि प्रमुख पद उम्मेदवार बेद गच्छदार, रामधुनी नगरपालिकाका प्रमुख पदका उम्मेदवार सुदीप अधिकारी,इटहरी उपमहानपालिकाका प्रमुख पदका उम्मेदवार हेमकर्ण पौडेल लगायतका उम्मेदवारहरुलाई चुनावी प्रचार प्रसारका समाग्री हस्तान्तरण गरिएको डा.हुसेनले जानकारी दिएका छन् ।
नेपाली कांग्रेस केन्द्रीय युवा प्रचार नेटर्वक उपसमितिका केन्द्रीय सदस्यको जिम्मेवारी डाक्टर अबुल हुसेन अन्सारीले पहिलो पटक गृह जिल्ला सुनसरी पुगेर नेपाली कांग्रेसका उम्मेदवारहरुलाई नेपाली कांग्रेसको झण्डा लगायतका चुनावी प्रचार प्रसार समाग्री हस्तान्तरण गरिएको हो ।
पालिकाहरुमा नेपाली कांग्रेसको चुनावी प्रचार प्रसार समाग्री अभाव भएमा सुनसरीको १२ वटै स्थानीय तहमा आवश्यकता अनुसार उपलब्ध गराउने उनले प्रतिवद्धता समेत व्यक्त गरेका छन् । कांग्रेसका उम्मेदवारहरुलाई बिजयी बनाउनु पर्ने उद्देश्यका साथ अहिले डा. हुसेन अन्सारी सहितको टिम सक्रिय भएर भूमिका निर्वाह गरिरहेका छन् ।
